Sápmi |

Giehtaruohttasii mieđihuvvon guovlovárremis dahkkon golbma váidaga – Sámedikki mielde Tukes doaimmain leat meannudanfeaillat

Davvi-Suoma hálddahusriektái lea dahkkon golbma váidaga das, go Dorvvolašvuođa ja kemikáladoaimmahat Tukes dohkkehii málbmaohcanfitnodaga várrenalmmuhusa Eanodaga Jiehtačerrui.

Saamelaiskäräjien puheenjohtaja Tuomas Aslak Juuso.
Sámedikki ságadoalli Tuomas Aslak Juuso ii leat duđavaš dasa, mo Tukes lea meannudan málbmaohcanfitnodaga várrenalmmuhusa dieđihemiin. Govva: Ville-Riiko Fofonoff / Sámediggi | Saamelaiskäräjät

Málbmaohcanfitnodaga várrenalmmuhusas Eanodaga Jiehtačearu guvlui lea dahkkon golbma váidaga Davvi-Suoma hálddahusriektái.

Ovtta váidaga lea dahkan Suoma Sámediggi ja ovtta váidaga fas Eanodaga guovllu olbmot. Yle Sámi dieđus ii leat goalmmát váidaga dahkki.

Mannan vahkus muitaleimmet das, go Giehtaruohttasa bálggus hirpmástuvai málbmaohcanfitnodat Akkerman Finland Oy várrenalmmuhusas. Málbmaohcanfitnodagas lea plánan bargat earret eará eanandutkamušaid guovllus ja ohcat málbmaohcanlobi ovdal várrenáiggi nohkama. Várrenáigi bistá 31.1.2022 rádjái.

Juuso: Doaimmaid váikkuhusat sivvan váidimii

Sámedikki ságadoalli Tuomas Aslak Juuso muitala, ahte Sámediggi lea váidán áššis, dasgo das leat leamaš ovdamearkka dihte meannudanfeaillat.

– Dat, mo Tukes lea dán birra dieđihan ja almmolaččat muitalan áššis, ii leat leamaš buorre. Maid dat, ahte sámegillii ii leat dieđihuvvon áššis maidege lea dieđusge okta dain ákkain, man dihte mii leat váidán várrenlobis, čilge Juuso.

Davvi-Suoma hálddahusrievttis árvalit, ahte sullasaš váidagiid gieđahallanáigi lea sullii jahkebealli, go geahččá diimmáža ja dán jagi gaskamearalaš gieđahallanáiggiid. Ášši váidináigi nogai vuossárgga 18.5.

Malminetsintäyrityksen varausalue Suomen Käsivarressa.
Málbmaohcanfitnodaga várren guovlu Eanodaga Jiehtáčearus. Govva: Renja Nurmi / Yle

Sámedikki ságadoalli Tuomas Aslak Juuso muitala, ahte dákkár doaimmaid váikkuhusat lea dat sivva, manin Sámediggi vuostálastá doaimma. Son čilge, ahte eananvárrejumi váikkuhusat ovdamearkka dihte boazodollui leat fuolastuhttit.

– Muđuige mii eat oainne vejolažžan hukset ja álgit várret eatnamiid dakkár ruvkedoaimmaide Sámi ruovttuguovllus ja earenoamážit, go leat Sámi kultuvrii ja boazodoallui dehálaš eatnamat.

Adreassa barggu vuolde

Máŋggat olbmot leat hirpmástuvvan málbmaohcanfitnodaga plánain dutkagoahtit Jiehtačearu eatnamiid.

Guovllus lea juo vásáhus dutkandoaimmain, go doppe leat čađahuvvon dutkanbovremat máŋga jagi. Tukes juolludii málbmaohcanlobi Geologiija dutkanguovddážii (GTK) Leahttáseanu guvlui Giehtaruohttasii suoidnemánu álggus jagis 2016. Dat lei vuosttas geardi, go málbmaohcanlohpi lea addojuvvon sámeguvlui ođđa ruvkelága áigge.

Dál badjel 1 100 olbmo leat searván Facebook-jovkui, mii lea ásahuvvon vuosttildandihte ruvkedoaimmaid dahje daid plánaid Giehtaruohttasis. Almmolaš joavkku siidduin muitalit áigumušas bargat neahttaadreassa doaimmaid vuosttildeapmái.

Varrasamosat: Sápmi

Váldoođđasat

Varrasamosat

Muualla Yle.fi:ssä