Sápmi |

Gielddapolitihka njunušbáikejuogut hápmašuvvet: Anáris juo válljejuvvon, Ohcejogas ráđđádallat, Eanodagas luomuid maŋŋel

Gieskat čađahuvvon gielddaválggaid maŋŋá lea áigi plánegoahtit válgabaji rollaid. Anára gieldda njunušbáikejuoguin mearridedje measta dalán válggaid maŋŋá, Ohcejogas Väinö Guttorm (kd) lea bovden eará lahtuid čoahkkimastit ja ráđđádallat, mo báikejuogu gánnehivčče bargat.

Väinö Guttorm
Ohcejohkalaš áirras Väinö Guttormis lea guhkes duogáš gieldda iešguđetlágán luohttámušdoaimmain. Govva: Vesa Toppari / Yle

Anáris leat mearridan gielddaráđđehusa báikkiin juo. Ohcejogas jurddan lea ráđđádallat juoga veardde boahtte vahkus, Eanodagas fas maŋŋelis.

Gielddaid váldostivrrat álget bargguidisguin borgemánu vuosttas beaivve ja dalle nannejit virggálaččat váldostivrraid ságájođiheaddjiid, gielddaráđđehusaid ja lávdegottiid láhttuid.

Mearridii bovdet earáid, vai ii dárbbašivčče jienastallat vuosttas čoahkkimis

Ohcejohkalaš áirras Väinö Guttormis (kd.) lea guhkes duogáš gieldda iešguđetlágán luohttámušdoaimmain. Guttorm mearridii ieš bovdet eará gieldda áirasiid čoahkkimastit ja ságastallat gielddapolitihka deháleamos stuoluid juohkimis.

Guttorm čilge, ahte son háliidii bovdet earáid čoahkkái ovdal mearrádusdahkama danin, ahte dalle ii dárbbašivčče šat jienastallat ja muđuige ášši ovdánivčče njuovžilabbot.

– Vuorddán ahte sáhtášeimmet ovttasráđiid heivehallat luohttámušbáikkiid nu, ahte dalle dan čoahkkimis, go das mearridit, de ii dárbbašivčče šat álgit menddo olu, Guttorm lohká.

Eanodagas vehá goittot gulaskuddan

Eanodagas bargojuogus eai leat velá mearridan. Bellodagaid siskkáldas joavkkuin áššiid birra leat goittotge vehá gulaskuddan.

Eanodatlaččaid jietna -oktasašlisttu jietnahárát Leena Palojärvi muitala, ahte mihkkige ii leat justa dál mearriduvvon, muhto áššái máhccet lagabus válgabaji álgima.

Anárii ođđa gielddaráđđehusa jođiheaddji

Anára gieldda ođđa váldostivrajoavkkut sohpe báikejuogus juo geassemánu bealde.

Váldostivrra, ságadoallin beassá Janne Tervahauta (guovddáš). Tervahauta lea vuosttas baji áirras. Gielddaráđđehusa vuosttas várreságadoallin álgá Anu Avaskari (kokoomus) ja nubbin várreságadoallin válggaid jietnahárát Anni Koivisto (sd).

Gielddaráđđehusa ságadoallin joatká juo goalmmát baji maŋŋálagaid Jari Huotari (kokoomus).

Anára gieldda dieđáhusas muitalit, ahte ráđđádallamat manne buorre vuoiŋŋas guovtti stuorámus bellodaga, guovddáža ja kokoomusa, jođihemiin. Virggálaččat mearrádusat nannejuvvojit vuosttáš čoahkkimis borgemánus.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä