Sápmi |

Gielddaválggain bidjet earenoamáš olu návccaid olbmuid dorvvolašvuhtii: oassi válgabargiin boahkuhuvvo

Gielddaválggaide gávdnojit rávvagat golmma sámegillii. Sihke válgabargiid ja jienasteaddjiid dearvvašvuohta orru leamen dáid válggaid ordnemis vuosttaš sajis.

Inarin kunnan viestintä- ja yhteistoimintajohtaja Anne-Marie Kalla.
Anára gieldda guovddášválgalávdegotti čálli Anne-Marie Kalla muitala, ahte dán háve válggat leat dagahan lassebargguid koronavirusdili dihte. Son goittotge lea giitevaš das, ahte Anáris koronadilli lea ráfálaš. Govva: Linda Tammela / Yle

Gielddat ordnejit gielddaválggaid riekteministeriija addin rávvagiid vuođul. Goit ovdamearkka dihte Anáris ja Eanodagas muitalit, ahte sii áigot boahkuhit daid válgabargiid, geat fitnet veahkeheamen vaikkoba ruovttujienasteamis.

Anára gieldda guovddášválgalávdegotti čálli Anne-Marie Kalla muitala, ahte ovdajienasteame várás gielddas leat doarvái olu válgabargit, maiddái sámegielagat.

– Mis leat sámegillii hirbmat buorit rávvagat doppe jienastanbáikkiin ja maiddái ovddalgihtii, ahte buot dieđut leat gal oaidninláhkái vai dat lihkostuvvá bures, lohká Kalla.

Ovdajienasteapmi gielddaválggain lea 26.5.–8.6. ja virggálaš válgabeaivi 13.6. Buot golmma Suomas hállojuvvon sámegillii gávdnojit gielddaválggaid rávvagat dán siiddus. Maiddái dasa leat bidjan návccaid, ahte koronadili dagahan spesiálaordnemiid dieđut leat olbmuide olámuttus.

Válggaid galgá válmmaštallat fuolalaččat

Koronadili geažil válggat sirdojuvvojedje geassái. Kalla mieđiha dan dagahan lassebargguid ja barggut leat earenoamáš olu. Riekteministeriija lea rávvagiid lassin ordnen guovddášválgalávdegottiide ovdamearkka dihte skuvlejumiid dálá dilis.

– Olu leat barggut ja galgá hirbmat fuolalaččat válmmaštallat dáid válggaid. Muđuige gielddaválggat leat dakkárat, ahte gielddas leat olu barggut, jus veardida eará válggaide. Lihkus Anára gielddas dát koronadilli lea hirbmat ráfálaš, doaivvu mielde maiddái válggaid áigge, muhto gal mii bargat olu vai dat jienasteapmi livčče dorvvolaš, čilge Kalla.

Eanodaga guovddášválgalávdegotti čálli Jenni Tapionlinna lohká, ahte oassi válmmaštallamiin lea bargon ovddalgihtii, muhto muhtin áššiid leat fas gártán dahkat nuppádassii, degomat gulahusaid.

– Mis koronadilli lea dagahan veháš eanet bargguid, muhto ii nu hirbmasit goittotge, Tapionlinna muitala.

Dearvvašvuohta lea vuosttaš prinsihppa

Dáid válggaid ordnemiin olbmuid dearvvašvuohta lea guovddážis. Riekteministeriija ja Dearvvašvuođa ja buresveadjima lágádusa rávvagiin leat deattuhan juo oahpes koronarávvagiid: báikki ala ii oaččo boahtit, jus ii leat suddjen muođuid njunne-njálbmesujiin. Dasa lassin ovdamearkka dihte persovdnaduođaštusa ii galgga addit válgabargi gihtii, baicce válgabargi almmuhan báikái.

Jenni Tapionlinna lohkáge, ahte dán jagi gielddaválggat leat máŋgga dásis earenoamážat.

– Galgá dárkkistit, ahte leat obalohkái dearvvašlaš ja dorvvolaš válggat, son dadjá.

Yle Ođđasiid Sámis ja Beaivvi ságaid sáhtát maid guldalit Yle Areenas.

Divvojuvvon 10.5.2021 dii. 14.21: Riekteministeriija skuvlen lei guovddášválgalávdegottiide, iige válggaid bargiide.

Varrasamosat: Sápmi

Váldoođđasat

Varrasamosat

Muualla Yle.fi:ssä