Sápmi |

Gielddaválggat 2021: Válgamášiinna vástádusaid vuođul eanaš oassi sámeguovllu evttohasain guottiha giellalasi máksima sámegiela máhtus

Yle válgamášiinna vástádusaid vuođul stuorámus oassi sámeguovllu gielddaválgaevttohasain guottiha dan, ahte sámegielat bargiide galggašii máksit giellalasi vai gielddat ožžot doarvái bargiid. Eanemus doarjja giellalassái gávdno Eanodagas. Eará gielddain oassi evttohasain gal ii guottit giellalasi.

válgamášen
Yle gielddaválgamášiinna sáhttá dán háve dahkat maid davvisámegillii. Govva: Yle

Yle válgamašiinnas leat jearran sámeguovllu gielddaválgaevttohasain giellalasi máksimis sámegielat bargiide. Válgamášiinna vástadusaid vuođul stuorámus oassi evttohasain guottiha giellalasi máksima, oassi gal fas ii.

Eanodagas buot evttohasat guottihit giellalasi máksima

Eanodat gielda máksá giellalasi 20–150 euro, dan mielde leago barggu gáibádussan sámegiela máhttu sihke njálmmálaš ja čálálaš máhtu mielde.

Eanodagas buot bellodagaid evttohasat jogo leat áibbas ovtta oaivilis dahje measta ovtta oaivilis das, ahte giellalasi galggašii máksit sámegielat bargiide.

vaalikonevastaukset
Govva: Yle

Ohcejogas oassi Olgešbellodat Kokoomusa evttohasain eai guottit giellalasi máksima

Ohcejoga gielddas mákset njálmmálaš gielladáiddus 100 euro mánus, ja njálmmálaš ja čálalaš sámegiela máhtus bargiide leat máksán 150 euro mánus.

Ohcejogas buot eará bellodagaid evttohasat guottihit giellalasi baicce Olgešbellodat Kokoomusas. Viđátoassi Kokoomusa evttohasain leat áibbas sierra oaivilis giellalasi máksimis.

vaalikonevastaukset
Govva: Yle

Anáris oassi stuorra bellodagaid evttohasain ii guottit giellalasi

Anára gielddas mákset unnimus giellalasi. Doppe njálmmálaš gielladáiddus mákset 11,77 euro mánus, ja njálmmálaš ja čálalaš dáiddus giellalassi lea virge- ja bargoeaktosoahpamuša mielde 15,14 euro mánus.

Anáris golmma bellodagas, Ruoŧŧelaš Álbmotbellodagas, Ruonáin ja Gurutlihtus, gávdno doarjja giellalasi máksimii.

Guovddášbellodagas ja Olgešbellodat Kokoomusas oassi evttohasain leat áibbas sierra oaivilis giellalasi máksimis.

Sosiálademokráhtain viđátoassi evttohasain ja Vuođđosuopmelaččain fas sullii 40 proseantta evttohasain leat veháš sierra oaivilis.

vaalikonevastaukset
Govva: Yle

Soađegilis Vuođđosuopmelaččat eai guottit giellalasi

Soađegili gielddas bargiide leat máksán sámegiela dáiddus 30 euro mánus.

Soađegilis guottihus giellalassái gávdno Kristtalašdemohkráhtain, Sosiálademohkráhtain, Gurutlihtus ja bellodagaid olggobeale listtuin.

Guovddášbellodagas oassi evttohasain lea veháš sierra oaivilis ja Ruonáin fas oassi evttohasain áibbas sierra oaivilis giellalasi máksimis.

Vuođđosuomelaččaid evttohasat buot leat vehás sierra oaivilis giellalasi máksimis.

vaalikonevastaukset
Govva: Yle

Evttohasaid oaiviliidda sáhttá oahpásmuvvat lasi Yle válgafálaldagaid bokte

Gielddaválgaevttohasaid oaiviliidda sáhtát oahpásmuvvat Yle válgamášiinna bokte. Válgamašiidna lea fállun suomagillii, ruoŧagillii, eaŋgalsgillii, ruoššagillii ja davvisámegillii. Davvisámegielat gažaldagat leat fállun sámeguovllu gielddain Anáris, Eanodagas, Ohcejogas ja Soađegilis, ja dasa lassin Suoma stuorimus gávpogiin dego Helssegis, Tamperes, Turkus, Jyväskyläs, Oulus ja Roavvenjárggas.

Kuntarundi-nammasaš válgaságastallamiid sáhttá guldalit Yle Areenas. Kuntarundis leat 294 oasi, main beassá vuodjut iešguđet gielddaid politihkalaš gažaldagaide. Juohke oasis leat golbma evttohasa ságastallamin ja ságastallama jođihit Yle guovlodoaimmaheaddjit.

Yle Sápmi lea buvttadan ságastallamiid sámegielddain ja Ohcejoga gieldda oasil ságastallan lea ordnejuvvon sihke davvisáme- ja suomagillii.

Gielddaválggat doaimmahuvvojit geassemánu 13. beaivve.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä