Sápmi |

"Giella ii ovdán lohkamuša haga" – Professor jorgaleamen rihkusromána

Čáppagirjjálašvuođagirjjit leat dárbbašlaččat giellaovdáneapmái, oaivvilda sámegiela professor Mikael Svonni. Danin son jorgala Åsa Larssona rihkusromána sámegillii.

Mikael Svonni
Govva: Vuoigatvuohtaministeriija

– Girjjit fertejit jorgaluvvot ja go in ieš máhte čállit girjjiid, de mon jorgalan girjjiid. Giella ii ovdán jus olbmot eai beasa lohkat čáppagirjjálašvuođa girjjiid ja mánát eai beasa gullat eaige lohkat sámegiela. Giela ovdáneapmái lea buorre jus gávdnojit girjjit sámegillii.

Ná dadja Gollegiella-bálkkašumiin bálkkašuvvon sámegiela professor Mikael Svonni SVT Sápmái.

Mannan čavčča álggahii Svonni veagainis girjelágádusa. Ovtta girjji leat almmuhan ja nubbi boahtá golggotmánus.

Dal son lea jorgaleamen dovddus čálli, gironlaš Åsa Larssona girjji Det blod som spillts. Suomagillii dat lea jorgaluvvon namain Sudentaival.

Åsa Larssona girji Det blod som spillts.
Govva: Otava
Dáhpáhusat girjjis leat Giron-guovllus.

– Mon dieđán man váttis lea jorgalit ja oainnán jorgalusaid mat eai leat álo nu buorit. Mu jurdda lea ahte dát galgá leahkit buorre jorgalus ja galgá leahkit somá lohkat.

Girječáll ilus jorgalusas

Åsa Larsson lea guođđan Girona ja orru dal Lulli-Ruoŧas. Su jurdagat jorret liikká Giron-guovllus. Son lea nu ilolaš go Mikael Svonni oallut girjjiid siste válljii juste su girjji ja vaikko lea almmuhuvvon 30 gielaide, de mearkkaša ollu ahte boahtá olggus sámegillii nai.

– Mu girji leat ovdal juo jorgaluvvon suomagillii. Mun čálán ruoŧagillii ja dal girji boahtá sámegillii. Visot golbma giela mat gávdnojit mu guovllus. Diehttelas lea stuora illu, Larsson dadjá.

Mikael Svonnis gal lea čielga mihttomearri jorgalanbargguin.

– Jus máhttá jorgalit nu bures ahte son gii lohká ii dieđe ahte lea jorgaluvvon, de lea buorre.

Varrasamosat: Sápmi

Váldoođđasat

Varrasamosat

Muualla Yle.fi:ssä