Sápmi |

Giellabeassedoaibma beassá viimmát johtui Eanodagas

Heahtá davvisámegielat giellabeasis leat vel guoros sajit.

Giellabeassi
Govva: Vesa Toppari / Yle Sápmi

Eanodaga gielda lea ráhččan garrasit manjemus jagi oččodan dihte davvisámegielat giellabeassedoaimma johtui. Váddáseamos leamašan gávdnat giellabesiide bargiid. Manjemus jahkebeali áigge lea gielda ohcan giellabeassebargi guktii bohtosiid haga. Dál viimmát goit lea gávdnon bargi ja doaibma beassá johtui jagi 2018 álggu rájes. Eanodaga beaiveruoktu Rievssaha vástideaddji mánáidgárdeoahpaheaddji Tiia Saatio illuda.

– Dat čájeha dan, ahte ii gánnit vuollánit. Váikko dat bargu leage bisttán guhká, de viimmátge mii beassat álgui dáinna doaimmain. Dat lea hirbmat buorre ođas, dadjá Saatio.

– Mun oainnán giellabeassedoaimma álgima dáppe Eanodagas hirbmat dehálažžan. Boahttevuođashan mis leat dasto eambbo mánát geat sámástit. Dat viiddida maiddái vejolašvuođaid geavahit sámegiela ja dat doarju bearrašiid ja kultuvrra. Mun lean nu ilus, ahte dat viimmatge šaddá duohtan, dadjá Tiia Saatio.

Tiia Saatio
Govva: Priváhta

Sávaldat viiddidit doaimma

Giellabeassedoaibma álgá vuos Heahtá gilis. Bealdovuopmáige leamašan ulbmilin vuođđudit giellabeasi, muhto dohko eai leat vel gávdnan bargi. Heahtá giellabeassedoaibma ordnejuvvo bearašbeaivedivššu hámis ja giellabeasis lea sadji njealjji ollesáigásaš mánnái ja ovtta oasseáigásaš mánnái. Dálá dilis giellabeasis leat vel guokte guoros saji. Saatio sávvá, ahte gielda beasašii viiddidit doaimma boahttevuođas maiddái eará giliide.

– Doaivumis mii beassat álggahit giellabesiid maiddái eará giliin. Dieđusge vuosttáš ášši lea dat, ahte ferte vuos gávdnat bargiid.

Heahtá davvisámegielat giellabeassi álggaha doaimmas gieldda láigovisttis. Ulbmil goittotge lea, ahte mánát galledit maiddái beaiveruovttus.

– Mii iskkat ordnet nu, ahte giellabeasi mánát bohtet stoahkat dohko beaiveruovttu šilljui ja oasálastet muđuige seammalágan doaimmaide go beaiveruovttusge, muitala Saatio.

"Giellabeassi doarju bearrašiid ja kultuvrra"

Eanodagas vánhemat eai leat nu aktiivvalaččat almmuhan giellabeasse dárbbus ja beroštumis. Eanodaga beaiveruoktu Rievssaha vástideaddji mánáidgárdeoahpaheaddji Tiia Saatio jáhkká, ahte eahpesihkkaris dilli lea dagahan dan.

– Dál go giellabeassedoaibma viimmát beassá johtui, de dat boktá sihkkarit fas beroštumi vánhemiin ja sii háliidit bidjat mánáideaset giellabeassái. Jáhkán, ahte oalle jođánit gielda šaddá ohcat eambbo bargiid ja viiddidit doaimma, dadjá Saatio.

–Sávan, ahte eambbo nuorat ohcalivčče dan suorgái, ahte mis livčče boahttevuođas bargit. Dán rádjái dat leamašan dat buot stuorámus čuolbma dan Eanodaga giellabeassedoaimma álggaheamis, ahte mo mii oažžut daid bargiid, dadjá Saatio.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä