Sápmi |

Giellabeassedoaibma bures lihkostuvvan – Roavvenjárgga giellabeasi mánát gulul sámaidahttigoahtán jo vánhemiid

Roavvenjárgalaš vánhemat hálideigga bidjat mánáideaskka Guovžabiedju-giellabeassái oahppat sámegiela. Gulul leat maiddái vánhemat oahppamin sámástit.

Mäkimurto bearraša mánná stoahká Roavvenjárgga giellabeasis
Govva: Kirsti Länsman/ Yle

Roavvenjárgalaš Mäkimurto bearraša mánát eaba ovdal hállan sámegiela, muhto vánhenguovttos háliideigga goittotge bidjat mánáideaskka giellabeassái giela oahppat. Jagi leaba mánáguovttos stoagadan Roavvenjárgga giellabeasis.

Roavvenjárgalaš Marjut Mäkimurto Guovžabiejus
Govva: Kirsti Länsman/ Yle

– Mu mielas mánát ohppet stoagadettiin sámegiela. Dat boahtá leat sidjiide ávkin stuoribun, jos beare jotket skuvlabálgáid rádjai. Siepman lea gilvojuvvon, sávvamis dat ihtá, dadjá Marjut Mäkimurto.

Giellabeassedoaibma viidon

Roavvenjárgga davvisámegielat giellabeasis, Guovžabiejus, ledje rabas uvssat buohkaide čakčamánus. Vádjit jagi boaris Roavvenjárgga davvisámegielat giellabeassi Guovžabiedju fárrii ođđa lánjáide.

Ávvudoaluid gudnin Sámedikki giellabeassekoordináhtor Heli Aikio muitala giellabeassedoaimmas ja mo sii ovttas bastet doarjut guđet guoibmáseaset.

Guovžabiedju giellabeassi
Govva: Kirsti Länsman/ Yle Sápmi

– Giellabeassi lea oaivvilduvvon  sámemánáide, geat eai muđuid beasa oahppat giela ruovttus dahje sus lea giellagáhttendárbu. Muhto jos ruoktogiellan lea sámegiella de su dikšobáiki lea eatnigielat beaiveruoktu, muitala Heli Aikio.

Dál leat giellabeasis guhtta máná ja guokte divššára. Eanetge mánát čágašedje. Beaiveruoktoagis mánáid giella ovdána jođánit, illuda mánnadivššár Aili Nuorgam.

– Goittotge mánát leat oahppan sámegiela dien láhkai bures. Mun gal sáhtán dáppe hállat áibbas maid beare ja mánát dihtet man birra mun lean hállamin ja de álgá boahtit maiddái ahte mánátge sámástit.

Gielladáidu sirdása mánáin vánhemiidda

Eadni liiko go mánáguovttos beassaba stoahkat ovttas ja dasa lassin oahppaba vel sámegiela. Mánát leaba jo gulul sámaidahttigoahtán maiddái váhnenguoktá.

– Giella boahtá veagalge ruoktot, go mánáguovttos leaba jo dadjagoahtán sámegielat sániid. Eadnige ferte giddet fuomášumi árgabeaivve sániide. Min bearrašis áigut boahttevuođas hállagoahtet vehá sámegillii maid, muitala Mäkimurto.

Varrasamosat: Sápmi

Váldoođđasat

Varrasamosat

Muualla Yle.fi:ssä