Sápmi |

Giellabeassedoaibma nohká Helssegis dán geasi – gávpot fállá sámegielat beaivedivššu čavčča rájes

Helssega gávpot vuordáge jo dál ohcamušaid davvisámegielat beaivedikšui.

Máttabiegga
Govva: Helga West / Yle

City-Sámit searvvi Máttabiegga-giellabeasi doaibma nohká boahttevaš geasi. Sivvan dasa lea, ahte ruhtadeapmi, man searvi lea ožžon giellabeassedoaimma várás, nohká. City-Sámit leage geahččalan gávdnat čovdosa áššái ovttas Helssega gávpogiin ja Sámedikkiin.

Helssega gávpot lea dál almmuhan, ahte dat bidjá johtui boahtte čavčča rájes davvisámegielat árrabajásgeassima beaiveruoktu Susannas Oarje-Pasilas. Beaiveruovttus álggaha sámegielat joavku ja dat oažžu iežas sajiid ja doaibma lea oalát sámegillii. City-Sámit searvvi ságadoalli Inka Musta lea ilus das, ahte Helssega gávpot basttii doaibmat ná jođánit.

– Gávpot lea duođaid háliidan oažžut sámegielat beaivedikšodoaimma johtui, go doamihii dáinna áššiin. Gávpoga bealis háliiditge lagaš ovttasbarggu sámebearrašiiguin ja gávpotsámi servodagain vai bálvalus duhtadivččii bearrašiid. Maiddái searvi bargá ovttas gávpogiin, vai oaivegávpotguovllus bures álgán giellaealáskahttinbargu ain ovdánivččii, muitala City-Sámit searvvi ságadoalli Inka Musta.

Inka Musta Helssegis gáktebeaivve 2015.
City-Sámit searvvi ságadoalli Inka Musta. Govva: Helga Siljander / Yle

Helssega gávpoga mielde beaivedikšui sáhttet dál ohcat sihke eatnigielat mánát ja maiddái dakkár mánát, geain ii leat vel giellamáhttu. Beaivedikšojoavkku vuođđudeapmái ii leat biddjon vuolimusrádji das, ahte man olu mánát galget leat ovdalgo doaibma álgá.

Ohcamušaid beaiveruoktu Susanna sámegielat beaivedikšojovkui sávvetge oažžut dál jođánepmosit. Dikšobáikkiid juohkigohtet dađi mielde báikkiid ohcan bearrašiidda.

Lassidieđuid dikšobáikkiohcamii gávnnat Helssega gávpoga neahttasiidduin dáppe.

Ášši dievasmahttojuvvo ja beaividuvvo otnáža áigge.

Varrasamosat: Sápmi

Váldoođđasat

Varrasamosat

Muualla Yle.fi:ssä