Sápmi |

Giellabeassi Máttabiekka ruhtadeapmi lea bissehuvvon goit dan boddii, go dutket City Sámit -searvvi ruhtamoivvi

City Sámit -searvi dieđihii mannan vahkus, ahte giellabeassi Máttabiekka doaibma nohká, danin go dan ruhtadeapmi nohká. Oahpahus- ja kulturministeriija ii mieđit ruđa searvái nu guhká, go searvvi prošeavttat leat dárkkistusdoaimmaid vuolde.

Máttabiegga
Govva: Helga West / Yle

Oahpahus- ja kulturministeriija lea bivdán Sámedikki bissehit ruhtajuolludeami City Sámit -searvái dassážii, go dutket searvvi ruhtamoivvi. Danin City Sámit -searvvi stivra lea mearridan, ahte giellabeasi doaibma heaittihuvvo.

Oahpahus- ja kulturministeriija mearrádus laktása doarjjabadjái 2015-2016. Dalle searvái leat máksán giellabeassedoarjaga badjel 40 000 euro eanet, go giellabeasi goluid ektui livččii leamašan dárbu. Dát boahtá ovdan Sámedikki stivrra beavdegirjjis 5/2018 (Sámediggi).

Searvi oaččui njukčamánus čilgenbivdaga giellabeassedoarjagiid geavaheames Sámedikkis, mii hálddaša oahpahus- ja kulturministeriija giellabeassedoarjagiid. Dan maŋŋá searvi ráđđádallagođii Helssega gávpogiin sámegielat árrabajásgeassima dorvvasteames.

Helssega gávpot lea almmuhan, ahte dat bidjá johtui davvisámegielat árrabajásgeassima boahtte čavčča rájes beaiveruoktu Susannas Oarje-Pasilas. Beaiveruovttus álggaha sámegielat joavku ja dat oažžu iežas sajiid.

Dárkkistusa vuolde leat sihke giellabeasi ruhtadoarjagat ja kulturguovddáža prošeaktaruđat

City Sámit -searvi lea ožžon oahpahus- ja kulturministeriija mieđihan ruhtadoarjaga guovtti sierra báikkis: kulturguovddášdoarjaga njuolga ministeriijas ja giellabeassedoarjaga ministeriija mearreruđas Sámedikki bokte.

– Dárkkistusdoaimmaid vuolde leat City Sámiid giellabeassedoibmii mieđihuvvon veahkkeruđat ja kulturguovddážii mieđihuvvon prošeaktaruhta, muitala oahpahus- ja kulturministeriija erenoamášplánejeaddji Mikko Cortés Téllez.

Skábmamánus 2016 City Sámit -searvi dieđihii lahtuideaset eahpečielggasvuođain searvvi ruhtadoalus, mat ledje šaddan kulturguovddáža vuođđudeapmái dárkkuhuvvon ruđain. Searvi lea čielggadeamen, leatgo kulturguovddášprošeavtta plánemii ja vuođđudeapmái dárkkuhuvvon ruđat geavahuvvon buot osiin rivttesláhkai.

– City-Sámit -searvi čielggada dál ovttas oahpahus- ja kulturministeriijain ja Sámedikkiin doarjagiid geavaheami, dadjá City Sámit -searvvi ságadoalli Inka Musta.

Musta ii kommentere dán muttus dađi eanet ášši.

Oahpahus- ja kulturministeriija erenoamášplánejeaddji Mikko Cortés Téllez muitala Yle Sápmái, ahte nu guhká go searvvi prošeavttat lea dárkkistusdoaimmaid vuolde, ministeriija ii mieđit ruđa City Sámit -searvái.

Oahpahus- ja kulturministeriija virgeolbmot gerget dárkkistusdoaimmain vejolaččat miessemánu áigge.

– Dalle čielgá, mo dás ovddos guvlui, dadjá Mikko Cortés Téllez oahpahus- ja kulturministeriijas.

Varrasamosat: Sápmi

Váldoođđasat

Varrasamosat

Muualla Yle.fi:ssä