Sápmi |

Giellagas-instituhta studeanttaguovttos čálliba master barggu sámegiela čállinmeattáhusain

Sámegiela studeanta Solja Magga sávvá, ahte olbmot duosttašedje čállit sámegillii vejolaš čállinmeattáhusain fuolakeahttá.

Jietna: Solja Magga
Jietna
Guldal dás olles jearahallama.

Anárlaš Solja Magga lohká sámegiela Oulu universitehta Giellagas-instituhtas, ja dál son lea čállimen ovttas skuvlaoappáinis, Unna-Maari Pulskain, gradu nappo master barggu.

Studeanttaguovttos čálligođiigga master barggusteaskka cuoŋománus. Fáddán soai válljiiga davvisámegiela čállinmeattáhusaid.

– Fuobmáime, ahte lea ihtán ođđa girji, masa leat čohkken (logahat studeanttaid) studeantateavsttaid. Álggiime dan dutkagoahtit, ja orui lunddolaš dutkat daid teavsttaid čállinmeattáhusaid, muitala Magga.

– Moai letne dan materiála analyseren, ja juohkán daid meattáhusaid sierra dásiide; dássemolsašuddanfeaillat gullet morfologija beallai (sániid sojaheapmi), sátnefeaillat fas leksemafeaillat ja nu ain, de moai letne de juohkán daid sierra dásiide. Dál master barggu galggašii čállit loahpalaš hápmái.

Dan girjái leat čohkken studeantateavsttaid jagiin 1997-2009. Solja Magga muitala, ahte olles dán áiggis studeantat leat čállán bures, muhto eambo son ii bohtosiid birra muital - goit vuos.

– Eanemusat leat ortográfalaš (riektačállin) feaillat, ja ovdamearka dihte á-bustáva lea dieđus hui váttis. Muhto jus háliida bohtosiin eambo diehtit, de ferte lohkat munno gradu, boagusta Magga.

Magga árvala, ahte master bargu livčče gárvvis boahtte čavčča.

Sámegillii čállimis ii dárbbaš bállat

Sámegiella ii leat dat álkimus giella čállit. Magga lohkáge, ahte sierra suopmanat váikkuhit čállingillii ja riektačállin lea dušše soahpamuš.

– Sámegiela ortografija lea hui váttis, galggaliigo dat ortografija leat dasto heivehuvvon hupmangillii, smiehtada Magga.

Solja Magga goittotge sávvá, ahte olbmot duosttašedje čállit sámegillii. Son muittuha, ahte giella lea dárkkuhuvvon geavahuvvot, iige das galggašii ballat.

– Jus feile, de Ii dat leat váralaš. Ii dan maŋŋá dáhpáhuva mihkke baháid.

Guldal olles jearahallama Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä