Sápmi |

Giellaofelaš lea doppe gos dáhpáhuvvá – Son veahkeha ja roahkasmahttá mánáid ja nuoraid sámástit

Giellaofelaš Teija Kaartokallio ávžžuha sámástit álo go dasa lea vejolašvuohta.

Teija Kaartokallio, Sáárá Seipiharju ja Marianne Ketola
Giellaofelaččat Teija Kaartokallio, Sáárá Seipiharju ja Marianne Ketola lágidit konseartta Ijahis Ijas. Govva: Anneli Lappalainen \ Yle

Teija Kaartokallio máttut leat Ohcejogas vaikko son leage riegádan Janakkalas lahka Hämeenlinna. Kaartokallio jerre giellaofelažžan ja son smiehtai, ahte maninba ii ja dat orui somás bargu. Sus leamašan álo stuorra mokta bargat giela ovdii. Son lea oahpan sámástit rávesolmmožin.

Teija Kaartokallio
Giellaofelaš Teija Kaartokallio Govva: Anneli Lappalainen \ Yle

– Mun čájehan, ahte jos ii leat mánnán sámástan, de maŋŋelisge sáhttá giela oahppat, muitala Kaartokallio.

Son beasai Ijahis Idja -festiválas rivttes bargui ovdidit ja leat ovdagovvan mánáide ja nuoraide sámegiela geavaheddjiin. Son láidestii ovttas eará giellaofelaččaiguin mánáid ja nuoraid konseartta.

– Mun háliidan, ahte sáhttá sámástit ja gánneha sámástit, jos dušše dasa lea vejolašvuohta.

"Mii dárbbašat gielalaš ovdagovaid"

Dán jagi čalmmustahttet sámegielaid Ovttastuvvan Našuvnnaid álgoálbmotgiellajagi olis. Sámedikki gielladorvočálli Anne Kirste Aikio illuda go leamašan vejolašvuohta hutkat iešguđetlágán doaimmaid, mat ovddidit sámegiela.

– Sámásteaddjiid ulbmil lea movttiidahttit min sámástit. Mii dárbbašat gielalaš ovdagovaid. Sámegiella lea dakkár sajádagas, ahte dat dárbbaša roahkasmahttima ja movttiidahttima. Mii galgat ain dihtomielalaččat sámástit eambbo iešguđetlágán forumiin, ávžžuha Aikio.

– Min njeallje sámásteaddji ovddastit buot Suomas hállojuvvon sámegielaid ja sii leat Marianne Ketola, Sáárá Seipiharju, Teemu Titola ja Teija Kaartokallio.

Sámásteaddji-raddemearka
Sámásteaddji-raddemearka muitala, ahte son sámásta. Govva: Maiju Saijets \ Yle

Doaibma ollašuhtto oahpahus- ja kulturministeriija mieđihan ruhtademiin ON:id eamiálbmogiid gielaid jagi fuopmášahttimii.

"Lea dehálaš, ahte sámegiela sáhttá geavahit árgabeaivválaččat"

Matba earát go festiválat čohkkejit nuoraid birra Sámi ovtta sádjái. Viola Ukkola lea boahtán čuovvut Ijahis Ija Anárii Soađegili skuvlajoavkku fárus. Son ádde sámegiela muhtin veardde ja čállá maid, muhto hállan leage váddásut.

Viola Ukkola
Viola Ukkola atná dehálažžan, ahte giela sáhttá geavahit árgabeaivválaččat. Govva: Anneli Lappalainen \ Yle

– Mu mielas lea suohtas gullat ja oaidnit mánáid ja nuoraid lávddi aldi go sii easka oahpahallet dáid dáidduid, rámida Ukkola.

Ukkola atnáge dehálažžan dán, ahte nuorat sohkabuolvvat geavahit giela.

– Vaikko giela oahpašii maŋŋáge de dat movttiidahttá geavahit dán.

Dán ášši sáhttát geahččat Yle Ođđasat -sáddagis vuossárgga dii. 16.45 TV 1:žis. Yle Ođđasat leat oaidnimis maŋŋelis Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä