Sápmi |

Gilbbesjávrri geainnu dálvefuolahus rievdá bajimus vejolaš dássái – ámmátvuoddji ii jáhke das leat olu ávkki

Táksevuoddji Elli-Maria Kultima mielas váldogeaidnu 21 lea nu baski ja heittot Gilbbesjávrre geahčen, ahte áidna mii veahkeha, lea geainnu govddideapmi ja divvun.

Taksiyrittäjä Elli-Maria Kultima Kilpisjärventiellä.
Táksevuoddji Elli-Maria Kultima dovdá juohke mohki Gilbbesjávrri geainnus. Govva: Tapio Nykänen

Maŋimuš jagiid váldogeaidnu 21 Durdnosis gitta Gilbbesjávrái lea beaggán olu das, go olgoriikkalaš tráilerat leat vuodján doarrás ja báikkálaččat leat šaddan ballat geainnu alde.

Ođđajagimánu vuosttas beaivve rájes geaidnu gullá riikkadásis váldojohtolahkii. Dat dárkkuha dan, ahte geainnu dálvefuolahus rievdá buoremus vejolaš dássái.

Vel ii leat sihkkarvuohta das, makkár doaimmaiguin geainnu dálvefuolahusa áigot buoridit. Davvin dálki ja buollašat dagahit dan, ahte geainnu eai sáhte sáltet dego máddin. Muhtin jurdagat goit leat, muitala EBI-guovddáža bajit hoavda Jaakko Ylinampa.

– Dakkár áššiid leat smiehttan, ahte man olu ovdamearkka dihte muohta dahje šoavli oažžu čoggot ja man guhká geaidnofuolahus oažžu ádjánit, čilge Ylinampa.

Lapin ELY:n tiejohtaja Jaakko Ylinampa.
EBI-guovddáža bajit hoavda Jaakko Ylinampa. Govva: Lapin ELY

Gilbbesjávrilaš táksevuoddji Elli-Maria Kultima lea vuodján Gilbbesjávrri geainnu jo badjel 40 jagi ja dovdá juohke mohki Gilbbesjávrris gitta Muoná rádjai. Kultima illudii go gulai, ahte geainnu dálvefuolahus buorrána, muhto vehá goit eahpida, leago das ávki Giehtaruohttasa oasil.

– Geainnushan leat goittotge fuolahan áibbas bures. Dilli lea Giehtaruohttasis áibbas iežas luohkás eará Suoma geainnuid ektui. Danhan dat dálvefuolahusa buorideapmi ii rievdda. Oaidnit leš maid dat dahká, ii dat goittot geainnu govddit.

Váldogeaidnu 21 ortnet rievddadallá; maŋimuš 50 kilomehtera Gilbbesjávrri guvlui geaidnu lea baski ja heajos ortnegis. Kultima mielas dasa ii veahket eará go geainnu govddideapmi ja divvun.

Geainnu divvumis eai leat dán muttus dahkkon mearrádusat

EBI-guovddáža bajit hoavda Jaakko Ylinampa mieđiha, ahte geainnu davágeaži govdodahkii ja geometralaš váilevašvuođaide eai sáhte váikkuhit dálvefuolahusa buoridemiin – dasa dárbbašuvvošii sierra ruhtadeapmi.

– Dárbu livččii govddidit geainnu ja buoridit dan geometriija. Das leat olu mohkit, miellit ja váttes sajit. Dasa dárbbašuvvošii stuorát ovddidanruhtadeapmi, mainna geainnu oaččošii váldogeainnuid dássái.

Mearrádusaid investerenruhtademiin dahket riikkabeivviin. Váldogeaidnu 21 oasil eai leat dahkkon mearrádusat.

Ovdal go váldogeaidnu 21 sirdása váldojohtolatluohkkái, galget ođasmahttit geaidnofuolaheaddjiid soahpamušaid.

– Dál lea dakkár dilli, ahte min dálá soahpamušat geaidnofuolaheaddjiiguin leat dahkkon dihto dási mielde ja dál galgat ráđđádallat das, makkár lassehaddi ođđa doaibmabijuin šaddá. Dat lea okta ášši, mii dán dillái dasto váikkuha, čilge Jaakko Ylinampa.

Lapin kartta
Váldogeaidnu 21:žis lea olu tráilerjohtolat. Govva: Yle

Go áššis leat ráđđádallan geaidnoguolaheaddjiiguin ja geaidnofuolahusa buorideami doaibmabijut leat dieđus, áigu EBI-guovddáš dieđihit áššis lasi. Táksevuoddji Elli-Maria Kultima sávvá, ahte ođastus buorida dorvvolašvuođa.

– Maid dat dasto geavadis lea, in dieđe. Sávvamis dat ii dárkkut dan, ahte dáppe johtet ain stuorát tráilerat.

Jaakko Ylinampa ja Elli-Maria Kultima jearahallamiid sáhttá guldalit Yle Areenas vuossárgga Yle Sámi iđit -sáddagis. Ášši álgá áiggis 09:48.

Varrasamosat: Sápmi

Váldoođđasat

Varrasamosat