Sápmi |

Gilbbesjávrri geainnus divodedje borgemánus muhtun osiid – geaidnodoaimmahat evttohan várret čuovvovaš jagiid divodemiide 27 miljovnna euro

Čuovvovaš gávcci jagi áigge Gilbbesjávrri geainnu áiggoše divodit eanetge. Geaidnodoaimmahaga álgoevttohusas leat várren Bálojohnjálbmi-Mávdna gaskka divvumii 23 miljovnna euro ja Áillahasluokta-Gilbbesjávrri gaskka divvumii njeallje miljovnna euro.

Kilpisjärven Saana-tunturi syksyisen ruskan keskellä.
Gilbbesjávrri geainnus Bálojohnjálbmi-Mávdna ja Áillahasluokta-Gilbbesjávrri gaskaid divvun lea mielde geaidnodoaimmahaga álgoevttohusas. Govva: Harri Rintakorpi

Gilbbesjávrri geaidnu lea guhká leamašan heittot ja roggái ja báikkálaččat lea gártan várret liigeáiggi geainnu vuodjimii. Dál dilli lea goittotge buorránan, muitala Juha Tapio EJB-guovddážis.

– Borgemánu áigge leat divvon riikkageaidnu 21:ža guovtti sajis Väliniva-Guhttás ja Roabičoalbmi-Iitu gaskkain.

Guhká leamašan sáhka maiddái das, ahte olles Gilbbesjávrri geainnu galggašii divvut. Dat ii leat goittotge vel ollašuvvan, muhto muhtunlágan rievdadus sáhttá leat boahtime.

– Geaidnodoaimmahat lea dahkan álgoevttohusa čuovvovaš gávcci jahkái. Evttohusas leat várren Bálojohnjálbmi-Mávdna gaskka divvumii 23 miljovnna euro ja Áillahasluokta-Gilbbesjávrri gaskka divvumii njeallje miljovnna euro.

Tapio muittuha, ahte dát lea goittotge easkka álgoevttohus ja Suoma riikkabeaivvit loahpa loahpas mearridit, makkár prošeavttaid ollašuhttet ja goas. Son goittotge jáhkká áššiid ovdánit.

– Gal mii leat dál olu guhkkeleappos, go maid leat guhkes áigái leamašan, dadjá Tapio.

Lasihuvvon 25.9. dii. 14.00 Govvejeaddjin merkejuvvon Harri Rintakorpi.

Yle Ođđasiid Sámis ja Beaivvi ságaid sáhttá guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä