Sápmi |

Gilbbesjávrri geasuheaddji galledanbáikái dárbbašuvvo korona dihtii rádjegozáhusa lohpi

Golmma riikka rádjegeađggi lusa beassá maiddái dán gease, muhto ráji rasttildeapmái dárbbašuvvo lohpi.

Kalle Mannela
Fanasvuoddji Kalle Mannela, muitala ahte lea váivi, go ruoŧŧelaččat eai beasa dámpatuvrii. Dábálaččat bealli turisttain leat ruoŧŧelaččat. Govva: Anneli Lappalainen / Yle

Kalle Mannela vuojiha M/S Malla -nammasaš dámppain turisttaid golmma riikka rájá ala Gilbbesjávrris.

Koronadili dihte dán gease doaibma lea vehá earálágán go ovdal. Ruoŧas lea vearrát koronadilli go Suomas, ja danin Ruoŧa ja Suoma rádji lea goit Suoma guvlui váldooasis giddejuvvon daidda, geat eai leat Suoma riikkavuložat.

Mannela muitala, ahte sii gal ožžot ain mannat Ruoŧa beallái dámppain, muhto sii fertejit bargat badjelmearálaš barggu ovdal go vulget.

– Mis lea lohpi mannat dohko gáddái, muhto ferte daidda bileahtaide čállit nama ja riegádanáiggi juohkehažžii. Dat váldá áiggi gal, olbmot galget diimmu ovdal boahttit dohko.

Mannela muitala, ahte sii fertejit oažžut Roavvenjárgga rádjegohcinlágádusas lobi ja almmuhit, ovdal go sii vulget. Ruoŧa ráji ii oaččo rasttildit meahcis, juos ii leat rádjerasttildanlohpi.

Kalle Mannela
Gilbbesjávrris leat suopmelaš turisttat jođus eambbo go dábalaččat geasit. Govva: Anneli Lappalainen / Yle

Kari Mäntynenä Muonio rádjegozáhusas muitala, ahte M/S Mallai lea mieđihuvvon lohpi johtit golmma riikka rájá ala, muhto sii fertejit čuovvut rádjegohcinlágádusa rávvagiid.

– Dámppa mátkkošteaddjit fertejit oastit ovddalgihtii bileahtaid. Dasto fitnodatdoalli almmuha midjiide listtu buot mátkkošteaddjin. Dain mátkkošteaddjin lea lohpi vázzit golmma riikka ráji ala ja Malla bálgá mielde ruovttoluotta Gilbesjávrái.

Maiddái ovttaskas vánddardeaddjit sáhttet ohcat lobi rájá rasttildeapmái Lappi rádjegohcinlágádusa njunušgottis. Mäntynenä goittot lohká, ahte dábálaččat olbmot johtet golmma riikka rájá ala namalassii dámppain.

Ruoŧŧelaččat eai goittotge beasa mielde dámpatuvrii. Fanasvuoddji Kalle Mannela mielas dat lea váivi. Son muitala, ahte vaikko suopmelaččat fitnet dámpatuvrras seamma olu go ovdalge, de dábálaččat bealli turisttain leat ruoŧŧelaččat.

Vaikko koronadili dihte ruoŧŧelaččat eai beasa Gilbbesjávrái, de báiki gal geasuha maiddái suopmelaččaid. Gilbbesjávrri vánddardanguovddážis muitalit, ahte Gilbbesjávrris leat dál olu suopmelaš turisttat jođus, joba eambbo go dábálaččat geassit.

Rávvagiid rájá rasttildeapmái ja vánddardeapmái Giehtaruohttasa guovllus gávnnat Meahciráđđehus luontoon.fi-neahttasiiddus.

Varrasamosat: Sápmi

Váldoođđasat

Varrasamosat

Muualla Yle.fi:ssä