Sápmi |

Gilbbesjávrri luodda lea nu heittot, ahte leat gártan vuolidit vuodjinleavttuid - Biilavuoddji Elli-Maria Kultima lea visot gallánan roggás geidnui

Vearrámus báikkiid áigot divvut dán čakčageasi ja olles geainnu divvumii leat ohcame ruđa.

Gilbbesjávrri luodda lea nu heittot ja roggái, ahte muhtun sajiin lea vejolaš cuvket biilla, jus ii dieđe garvit rokkiid.

Táksevuoddji Elli-Maria Kultima geavaha luotta measta beaivválaččat ja lea hirpmahuvvan, go šaddá vuodjit njozet, 60 kilomehtera diimmus, dakkár guovllus gokko geaidnu ii leat oba issoras mohkkáige.

-Dat lea boagustahtti, go vuolidit leavttu guđalohkkái, gos ii leat orrun. Iigo dasa jur eará vuohki leat mot daid sáhtálii dahkat, smiehttá Kultima.

Kultima muitala, ahte luodda lea dálvit gárži ja mannan giđa dat lei duođaid heitot. Son šaddá measta álot várret liigeáiggi, go dálvet vuolgá vuodjit, geassit gal nuge vel beassá. Kultima sávvá, ahte luotta divvun álggálii, go eandaliige dálvit luodda lea su mielas njuolga váralaš.

Lagaš áiggiin divvot binnáš, muhto stuorát geaidnodivvumis mearridit stáhta bušeahtas

EJB-guovddášii geainnu heajos ortnet lea oahpis. EJB-guovddášis Juha Tapio muitala, ahte luotta heajumus sajit divvojuvvot borge-čakčamánus.

Geainnu divodeami leat dolvon ovddosguvlui ja das mearriduvvo stáhta bušeahtas čakčat.

EJB-guovddáš leage jo máŋggaid jagiid evttohan stáhta geaidnodoaimmahahkii, (sg. Väylävirasto) ahte Gilbbesjávrri geainnu galgá divvut ja dasa dárbbašit mearreruđa. Luotta divvun álggálii plánemin ja dan maŋŋel ruđa dárbbaša ieš daid geaidnobargguide.

Váldoluoddaásahus lea dahkan Gilbbesjávrriluotta, nappo geainnu nummir 21, nubbin váldoluoddan davvin ja dat lasiha vejolašvuođa oažžut ruđa luotta divvumii.

Divvojuvvon 19.7. dii. 15.02 Juhani Tapio namman Juha Tapio.

Varrasamosat: Sápmi

Váldoođđasat

Varrasamosat

Muualla Yle.fi:ssä