Sápmi |

Gilbbesjávrri ođđa skuvla lea fargga gárvvis – "Buot oassebealit leat leamaš mielde hámushábmema rájes"

Skuvllas leat 12 oahppi vuođđoskuvla vuosttas luohkás ovccát luohká rádjai. Gilbbesjávrris ásset sullii 100 olbmo.

Kilpisjärven koulun rakennustyömaa heinäkuussa 2017.
Govva: Uula Kuvaja / Yle

Gilbbesjávrri gili ođđa skuvla Eanodagas lea farggabáliid gárvvis.

Skuvla bulii gutnan válboriid áigge guokte jagi dassái. Lihkus skuvlaráhkkanas lei dáhkiduvvon ollásit ja sadjái baste hukset ođđa máŋggadoaimmadálu, man muđui eai livčče várra suitán hukset. Dálu huksen mávssii sullii 3,2 miljon euro.

Gilbbesjávrri skuvllas leat 12 oahppi ja gilis orrot badjelaš čuođi olbmo. Go oahppit leat unnán, čáhkket máŋggadoaimmadállui luohkáid lassin maid eará lanjat.

Dállui boahtá sadji dearvvašvuođadivššárii, lihkadansále, álšasále ja rohkoslatnja. Seammá gáhtu vuollái boahtá maid mánáidgárdi ja nuoraidvisti.

Báikkálaččat leamaš mielde plánemin dálu

Eanodaga gieldda teknihkalaš jođiheaddji Kimmo Lämsä muitala, ahte Gilbbesjávrri olbmot leat beassan álggu rájes plánet máŋggadoaimmadálu.

– Buot oassebealit leat leamaš mielde hámuhábmema rájes, ahte dállu bálvalivččii buot oassebeliid nu bures go vejolaš. Kompromissaidhan gártá álo dahkat, buohkat eai oaččo visot, muhto goittotge ahte oažžut dakkár čovdosa masa buohkat leat duđavaččat, Lämsä lohká.

Dán vahkus skuvlaráhkkanasas isket dálloteknihka, dego áibmomolsuma ja liggema. Maiddái šiljjus leat vel maŋimuš barggut gaskan.

Roavenjárgalaš Laplan huksen máŋggadoaimmadállu luobahuvvo gildii mánu loahpas.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä