Sápmi |

Girjebussedoaibma ii vealttakeahttá nogage Ohcejogas – dál ráđđádallet Deanu ja Unjárgga gielddaiguin ovttasbarggu álggaheames

Dálá girjebusse lea heaitán dál johtimis Ohcejogas. Doaivva goittot lea ođđa girjebussefálaldagas.

girjebusse ohcejohka utsjoki kirjastoauto
Dát girjebusse lea dál heaitán johtimis Ohcejoga guovllus. Govva: Piera Balto / NRK Sápmi

Ohcejogas dahket otne duorastaga earrodearvvuođaid davviriikkalaš girjebussii, mii lea johtán Ohcejoga, Kárášjoga ja Porsáŋggu guovlluin 30 jagi. Fálaldat lea dál nohkan.

Dan maŋŋá, go Norgga Sámediggi mearridii geahpedit iežas ruhtadanoasi Sámi girjebussiin, balle girjebussedoaimma nohkat oalát Ohcejogas.

Doaivva goittot lea, ahte guovllus johttá vel ođđa girjebusse. Ohcejoga gielda lea ráđđádallamin Deanu ja Unjárgga gielddaiguin girjebusseovttasbarggu álggaheames.

Ovttasbarggu leat ain plánemin ja ráđđádallamat leat jođus, nuba soahpamušat áššis eai leat vel dahkkon. Danin dán muttus eai sáhte vel árvvoštallat, goas, mo ja makkár ruvtto ođđa girjebusse johttášii vuot Ohcejogas, dadjá Ohcejoga girjerádjodoaimma hoavda Tuija Guttorm.

Boares girjebusse gudnin fállet bullágáfiid Ohcejoga giliviessu Giissás otne duorastaga diibmu 10–12.

Davviriikkalaš girjebussedoaibma leamaš áitojuvvon maiddái Eanodaga, Muoná, Guovdageainnu ja Bájila guovlluin, muhto dálá dieđu mielde busse vuodjá goit jagi 2020 lohppii.

Varrasamosat: Sápmi

Váldoođđasat

Varrasamosat

Muualla Yle.fi:ssä