Sápmi |

Girjerádjobiila bálvala fas Ohcejogas – gielda álggahii ovttasbarggu Deanu ja Unjárgga girjerádjobiillain

Ohcejoga gieldda girjerádjobiiladoaibma Kárášjoga ja Porsáŋggu gielddaiguin nogai jagi 2019 loahpas.


Deanu/Unjárgga Girjebusse
Deanu ja Unjárgga girjerádjobiila johttá Ohcejoga gielddas jo boahtte vahkus. Govva: Deanu/Unjárgga Girjebusse

Ohcejoga gielda lea álggahan ovttasbarggu Deanu ja Unjárgga girjerádjobiillain. Ođđa girjebussefálaldat álgá Ohcejogas jo ođđajagimánu beallemuttus.

– Ođđa biilla mielde johtolatplána lea rievdaduvvon nu ahte dat bálvala gieldda olbmuid buorebut, dieđiha Ohcejoga girjerádjo- ja kulturdoaimmahoavda Tuija Guttorm.

Girjerádjobiila vuodjá Ohcejogas juohke nuppi vahku gaskavahkuid ja duorastagaid 15.1. rájes.

Vuosttas vuorru vuddjojuvvo gaskavahku 15.1. Njuorggámis Gámasmohki bokte Gáregasnjárgii. Duorastaga 16.1. girjerádjobiila lea Gáregasnjárggas, gos dat vuodjá Deanugeainnu mielde Ohcejohkii ja ruovttoluotta Njuorggámii.

Girjerádjobiilla áigetávvalat gávdnojit Ohcejoga gieldda neahttasiidduin.

Girjerádjobiillas sáhttá sihke luoikkahit ja máhcahit girjjiid, ja maiddái dahkat várremiid Lappi eará girjerájuin.

Varrasamosat: Sápmi

Váldoođđasat

Varrasamosat

Muualla Yle.fi:ssä