Sápmi |

Girkut gáibidit politihkkariin garra mearrádusaid: "Dálkkádatrievdamis gillájit eanemus eamiálbmogat, geain lea dasa unnimus sivva"

Barents guovllu kristtalaš girkuid ráđđi čalmmustahttá iežas jahkečoahkkima loahppacealkámušas dálkkádatnuppástusa váikkuhusaid eamiálbmogiidda. Jahkečoahkkin ordnejuvvui Anáris dán vahkus.

Barents guovllu kristtalaš girkkuid ráđđi, Anár
Barents guovllu kristtalaš girkkuid ráđđi čoahkkanii Anáris 9.-10.10.2018. Govva: Anneli Lappalainen / Yle

Barents guovllu kristtalaš girkuid ráđi (BRGR) ovddasteaddjit leat fuolas dálkkádatnuppástusas ja dan váikkuhusas eamiálbmogiidda.

Girkut namuhit iežaset jahkečoahkkima cealkámušas, ahte dál galgá heaitit smiehttamis dušše iežas ovdduid ja seastit luonddu maid boahttevaš buolvvaide. Barents guovllu kristtalaš girkut namuhit, ahte sii háliidit čalmmustahttit ášši dan maŋŋá go IPCC -riikkaidgaskasaš dálkkádatpanela almmuhii raporttas sotnabeaivve.

– Min mielas máilbmi ferte geavahišgoahtit ráidnasit energiija ja min eallinvuohki ja birgejupmi ferte šaddat guoddilaš. Mii ipmirdit, ahte dat gáibida garra mearrádusaid. Dan dihte mii bivdit, ahte min politihkkarat fertejit dál dahkat mearrádusaid eaige vuordit, ávžžuha kristtalaš girkuid ráđđi.

Čalmmustahtte árktalaš guovlluid dili maid jagis 2017

Barents guovllu kristtalaš girkut leat ovdalge váldán beali árktalaš guovlluid birasáššiide. Jagis 2017 ráđđi čálii Árktalaš ráđi presidentii, ahte ráđđi galggašii atnit Árktalaš guovllu stuorát árvvus go dušše vejolaš energiijagáldun.

Barents guovllu kristtalaš girkuid ráđđi muittuha varas cealkámušastis, ahte buohkat, muhto erenoamážit Sámit ja eará álgoálbmogat, geat ásset árktalaš guovllus gillájit juo dál dálkkádatrievdamiid dihte.

– Dálkkádatrievdamat billistit sihke álgoálbmogiid vejolašvuođaid joatkit sin árbevirolaš eallinvugiin, dat billistit daid birgenlági, geat juo ellet geafivuođas goikkádaga, dulvviid ja meara loktaneami dihte. Sii leat dat, geain lea unnimus sivva dan dillái, masa máilbmi dál lea ollen, cealká ráđđi loahppaávžžuhusastis politihkalaš mearrideddjiide.

Ráđđi oaidná, ahte dál galgá gávdnat guoddilaš čovdosiid buohkaide, dasgo buohkat dárbbašit doaivaga ja dáhtu rievdademiide.

Barents guovllu girkuid cealkámušaid lea vuolláičállán Davvi-Hålogalándda bismagotti bisma Olav Øygard, guhte lea Barents guovllu kristtalaš girkuid ráđi presideanta. Ráđđi čujuha cealkámušas Árktalaš ráđđái, Eurohpá kristtalaš luonddugáhttenfierpmádahkii ja Barents guovllu miellahttoriikkaid eiseválddiide.

Barents guovllu kristtalaš girkuid ráđđi lea Ruošša, Norgga, Ruoŧa ja Suoma luteralaš ja Ortodoksa girkuid davimus bismagottiid ekumenalaš fierpmádat. Fierpmádat čoahkkanii jahkečoahkkimii Anárii 9.–10.10.2018. Jahkečoahkkima temán ledje sápmelaččat ja girkut.

Varrasamosat: Sápmi

Váldoođđasat

Varrasamosat

Muualla Yle.fi:ssä