Sápmi |

Gittauvssaid duohken čielggadeamen Ruošša sámiid dili

Sámedikkit ja Ruošša beale sápmelaččat ságastalle gittauvssaid duohken Ruošša sámiid dili birra gaskavahku. Jo gárvvisin váttes dilli lea maŋimuš jagiid šaddan váddásabbon, daningo Ruoššas leat guokte organisašuvnna, mat navdojuvvojit virggálaš orgánan.

Aili Keskitalo, Ingrid Inga ja Tiina Sanila-Aikio
Govva: Berit Solveig Gaup / NRK

SPR sátnejođiheaddji Tiina Sanila-Aikio dadjá Ávvir-aviissas, ahte su dieđuid mielde Ruošša beale sámit eai vealttakeahttá duosta nu rahpasit muitalit diliset birra.

Davviriikalaš Sámedikkiid Sámi parlamentaralaš ráđđi (SPR) leage dán vahkus leamaš Murmánskkas ságastallamin sámiid ovddasteaddjiorgána vuođđudeamis Ruššii.

Oassi gaskavahku čoahkkimis lei giddejuvvon medias ja álbmogis.

Čoahkis 30 Ruošša sámi oasseváldi

Gulahallančoahkkima nubbi oassi gaskavahku lei oaivvilduvvon dušše 30 bovdejuvvon oasseváldái.

Mielde ledje ovddasteaddjit Guoládaga Sámiid Searvvis (GSS), Murmánskka guovllu sámesearvvis OOSMO, álgoálbmotráđis Murmánska guovllu vuolde, Guelnegk Neark Sami Sobbaris mii válljejuvvui Sámiid nuppi kongreassas jagis 2010, Sámi čoahkkimis (Sám´ Sobbar) mii válljejuvvui Sámiid goalmmát kongreassas jagis 2014, Murmansk Oblastis (guovllus), Davviguovllu álgoálbmogiid guovddáš GOBU:s ja Barents eamiálbmotbargojoavkkus.

Ruoššas guokte "Sámedikki"

Ruošša sámiid ovddasteaddjiorgána vuođđudeamis leat máŋga váttisvuođa, dego váttisvuođat Ruošša eiseváldiiguin.

Maŋimuš áiggiid lea buktán lassehástalusaid dat, ahte Ruošša bealde leat goit guokte sámi organisašuvnna, mat navdojuvvojit virggálaš ovddasteaddjin.

Dat leat jagis 2010 vuođđuduvvon Guelnegk Neark Sami Sobbar, man jođiha Valentina Sovkina ja jagis 2014 vuođđuduvvon Sám´ Sobbar, man sadjásaš jođiheaddjin lea Andrej Ageev.

Jagis 2014 vuođđuduvvon Sám´ Sobbar vuođđuduvvui sámekongreassas, man Ruošša eiseváldit lágidedje.

– Mun vuohtan, ahte eiseváldit figget sirret min álbmoga, daningo álbmoga mii lea bieđganan, lea álkit stivret, dadjá Sovkina Ávviris.

– Ovddemussan lea dárbu oažžut eiseválddiid ipmirdit sámiid dili. Eat sáhte joatkit ná ahte sámit dahket juoidá ja Ruošša eiseválddit fas eará, dadjá Ageev Ávviris.

Eai vel dieđut gulahallančoahkkima bohtosiin

SPR dieđáhusas ii vel muitaluvvon dađi dárkilabbot čoahkkima bohtosiin.

– Mii leat plánen lágidit dán čoahkkima jo máŋga jagi. Lea hui dehálaš, ahte SPR:s lea buorre gulahallan Ruošša beale sápmelaččaiguin ja mii beassát ieža gullat makkár hástalusat sis leat, dadjá Sanila-Aikio.

Varrasamosat: Sápmi

Váldoođđasat

Varrasamosat

Muualla Yle.fi:ssä