Sápmi |

Go fárre vuosttas geardde ruovttus eret, lea olu maid čielggadit – “Ferte leat doaimmalaš olmmoš ja máhttit ieš fuolahit áššiin”

Boarrásut studeanta rávve bargat geassit, seastit ruđa ja vaikko vel ieš murjet dálvvi várás.

Sara Keränen lii pargohárjuttâlmin Avveel kielâpiervâlist.
Sara Keränen lea fárremin čakčat Oului studeret anárašgiela Giellagas-instituhttii, muhto dan ovdal leat áššit maid son galgá čielggadit. Govva: Yle / Anja Kaarret

Anárlaš Sara Keränen fárre borgemánus vuosttas geardde ruovttus eret. Son vuolgá Oului studeret anárašgiela dán čavčča. Ovdal fárrema lea olu maid nuorra studeanta ferte čielggadit.

Son lea ferten ohcat dieđu ovdamearkka dihte das, mo oažžu vistti Oulus ja man olu ja mo son oažžu Álbmotealáhatlágádusas (ÁEL) doarjagiid.

Keränen lea ožžon PSOAS (su. Pohjois-Suomen opiskelija-asuntosäätiö sr) bokte vistti.

– Lea speanta fárret eret ruovttus ja álggahit universitehtas, ja buori mielain álggahan skuvlla. Lea suohtas go beassá stuorát báikái geahččat mii doppe oidno.

– Muhtun áššiid lean diehtán, muhto viehka olu lean ferten ieš čielggadit. Ássamii laktáseaddji áššiin in diehtán olu. Dasto dan smihtten, mo dohko universitehtii ferte almmuhit studeantan, muitala Keränen.

Vástádusat gávdnojit lihkus neahtas.

– Lean maid vánhemiin jearran mo duon ja dán ášši galggašii bargat.

– Olu leat barggut maid ieš ferte bargat ja čielggadit áššiid. Ferte leat doaimmalaš olmmoš ja ferte máhttit ieš fuolahit áššiin, jurddaša son.

Ruhtaáššiid son lea maiddái ferten vehá smiehttat.

– Mo ruđat reahkkájit, lean iskan seastit ja smiehttat masa dat ruđat mannet. Lean jurddašan maid, mo dat ÁEL ruđat reahkkájit, juos eai leat eará barggut.

Minna Länsman
Minna Länsman lea juo hárjánan studeantaeallimii, go son lea studeren juo máŋga jagi sámiid kultuvrra Oulu Universitehta Giellagas-instituhtas. Govva: Minna Länsman / Priváhtagovva

Geasi áigge studeanttat ráhkkanit čakčii ja oahpuid álgimii, dahje joatkašuvvamii. Njuorggánlaš Minna Länsman fárrii Oului studeret juo máŋga jagi dassái. Länsman studere dál guđát jagi sámekultuvrra Oulu universitehta Giellagas-instituhtas.

– Gal mun loavttán studeret Oulus, lean ožžon ođđa ustibiid go lean fárren deike. Dat gal lea leamaš somá, muitala Minna Länsman.

Dalle go vulggii Oului, de ii áibbas vuosttas geardde fárren ruovttus eret.

– Ohcejoga logahagas mun orron ásodagas, de dat dieđusge veahkehii olu, go lei vehá oahppan okto leat.

Njuorggán lea smávva giláš ja Ouluges lea stuorra gávpot, ja ruoktot lea guhkki.

– Dieđusge dat ii leat seamma dál, go Oulu lea nu guhkkin. Ahkidušan ruoktot olu, muhto go lea goittotge beassan fitnat davvin, de dat lea veahkehan olu. Ja maiddái dat go lea oahpásmuvvan dakkár olbmuiguin, geat leat davvin eret, smiehtada Länsman.

– Dieđusge mu veahkeha olu dat, ahte mun láven ieš murjet, de ii dárbbaš daid oastit. Ja maiddái dat veahkeha olu, go in dárbbaš ieš oastit bierggu dahje guoli, de das seasttán olu.

Yle dahkan čielggadeami mielde Oulus lea stuorra gávpogiid hálbbimus láigodássi. Gaskamearálaš láigu lei álgojagi 12,7 euro njealjehasmehteris, go dat muđui lei olles riikkas 14,6 euro, muitala Tilastokeskus.

Yle lea čállán suomagillii rávvagiid das, maid galggat vuhtiiváldit go fárret okto iežat vistái. Fárredettiin galgá váldit vuhtii ovdamearkka dihte dáhkádusláiggu máksima, ruovttudáhkádusa ordnema, ássandoarjagiid čielggadeami ja bušeahta ráhkadeami.

Álbmotealáhatlágádusa lassedieđuid studeantadoarjagiin gávnnat dáppe.

Suoma álbmotealáhatlágádusa doarjagat studeanttaide allaoahppodásis:

DoarjjaMearri mánotbajis
Oahpporuhta250,28 e
Oahppoloatna650,00 e
Almmolaš ássandoarjjamax. 312,00 e

Gáldu: Álbmotealáhatlágádus.

Varrasamosat: Sápmi

Váldoođđasat

Varrasamosat

Muualla Yle.fi:ssä