Sápmi |

Goahppelaš- ja Veahčajohkii vuvde vahágis duppalmeari guolástanlobiid mannan gease

Meahciráđđehusa fuođđodoallohoavda Jukka Bisi mieđiha, ahte dát lei duođai stuorra feaila.

Vapa.
Meahciráđđehusa vahát guoskkai jándorlobiid, maid vuvdet Ohcejogas olggobeale olbmuide. Govva: Pasi Peiponen / Yle

Meahciráđđehus vuvddii mannan gease menddo olu guolástanlobiid guovtte johkii Ohcejogas.

Meahciráđđehusa iežas mearrádusa mielde Goahppelašjohkii oaččui vuovdit 20 ja Veahčajohkii 100 jándorlobi. Olmmošlaš vahága dihte lohpegávpái biddjojedje goittotge vuovdinláhkai guovtte geardde eanet lobit.

Meahciráđđehus almmuhii vahágis otne bearjadaga Ohcejoga gieldda ráđđádallangotti čoahkkimis.

"Hui vearrás feaila"

Vahát guoskkai jándorlobiid, maid vuvdet olggobeale olbmuide. Báikkálaččain leamaš mannan giđa láhkanuppástusa maŋŋá vejolašvuohta oastit guovllu jogaide hálbbit áigodatlobiid, maid mearri ii leat ráddjejuvvon.

Daningo Goahppelaš- ja Veahčajogat leat bivnnuhat, buot lobit maiddái vuvdojedje. Meahciráđđehusa fuođđodoallohoavda Jukka Bisi mieđiha, ahte dát lei duođai stuorra meattáhus.

– Sáhka lea hui vearrás feaillas. Guolástanlága nuppástusaid dihte dát áššit leamaš rašit sámeguovllus. Mun sávan, ahte dát min feaila ii bilit buorre ovttasbarggu, mii mis leamaš sámeguovllus.

Bisi dáhkida, ahte Meahciráđđehus gieđahallá lohpevuovdinproseassa mohkiid amaset bártidit áššiin šat boahttevuođas.

Meahciráđđehus vuordá dál Luondduriggodatguovddážis dieđuid mannan geasi sállašiin ja lohpemeriin. Dan maŋŋá Meahciráđđehus guorahallá, galgetgo feailla váikkuhusaid váldit vuhtii, go plánegohtet boahtte jagi guolástanmeriid.

Varrasamosat: Sápmi

Váldoođđasat

Varrasamosat

Muualla Yle.fi:ssä