Sápmi

Goalmmát Skábmagovat-filbmaávžžuhus: Mátki Jaskes ábi sulluide ja eamiálbmogiid hástalusat ruvkefitnodagaiguin

Skábmagovat elokuvafestivaalin taiteellinen johtaja Jorma Lehtola.
Skábmagovaid dáiddalaš jođiheaddji Jorma Lehtola. Govva: Vesa Toppari / Yle

Skábmagovaid filbmaávžžuhusat -ráiddu goalmmát oasis dáiddalaš jođiheaddji Jorma Lehtola ávžžuha oahpásmuvvat guovtti filbmii Austrálias ja Ođđa-Selánddas.

Skábmagovaid temán lea dán jagi oktavuohta eatnamii. Festivála dáiddalaš jođiheaddji Jorma Lehtola ávžžuhage olbmuid fitnat geahččamin erenoamážit guokte filmma dán temás.

Vuosttas ávžžuhus lea ođđa-selánddalaš, dahjege maorigillii aotearoalaš Vai, man leat bagadallan gávcci nissona ja mas hállet olles gávcci giela: fidži-, tonga-, roviana- (Salomosullot), Samoa-, niuea-, eaŋgalas-, maori- ja Cook-sulluid maorigiela.

Nubbi ávžžuhus lea austrálialaš dokumeanta Undermined: Tales from the Kimberley, man čájeheami maŋŋá geahččit besset ságastallat riikkaidgaskasaš panelain ruvkedoaimmaid ja industriija birra.

Ná Lehtola muitala filmmaid birra.

Vai

"Jus háliida beassat Jaskes ábi lieggasii, de mis lea episodafilbma, man dáhpáhusat dolvot čieža sierra sullui doppe.

Filbma muitala nieidda ja nissona eallima iešguđet muttuin. Dat lea čáppa filbma."

Vai
Árbevierus, nissonvuođas ja fámuiduvvamis bohciideaddji máidnasa váldoolbmo namma lea juohke episodas "Vai" (sá. čáhci), man nektet sierra álbmogiidda gullevaš, iešguđet ahkásaš neavttárat guđege riikkas. Govva: Vai

Filbma čájehuvvo sotnabeaivve diibmu 14.00 sámekulturguovddáš Sajosis.

Undermined: Tales from the Kimberley

"Dát fiinna dokumentára muitala aboriginálaid garra eallimis ruvkefitnodagaid vuolde.

Filmma maŋŋá lea riikkaidgaskasaš panela, mas beassat gullat eamiálbmogiid uhkideaddji áššiin miehtá máilmmi. Sáhtán beare govahallat, ahte das šaddá buorre ságastallan. Ságastallamii oažžu searvat gii beare."

Undermined: Tales from the Kimberley
Fámolaš ruvkedoaimmat, guođoheapmi ja eanandoallu uhkidit Austrália viiddis ja guoskkatmeahttun Kimberley guovllu. Albert Wiggan, okta filmma buvttadeaddjiin, lea mearkkašahtti oasis máidnasis, mii guorahallá báhkka gažaldaga: gean ovdun nu gohčoduvvon ovdáneampi dáhpáhuvvá? Govva: Skábmagovat

Dokumeanta ja panelaságastallan leat lávvardaga diibmu 19.00 sámekulturguovddáš Sajosis.

Skábmagovaid olles prográmmakárta ja lassidieđut filmmain gávdnojit festivála neahttasiidduin.

Skábmagovaid filbmaávžžuhusat -ráidu oidno neahtas ja gullo rádios

Eamiálbmogiid filbmamáilmmis dehálaš filbmafestiválan šaddan Skábmagovat lea fas dán vahkus Anáris.

Skábmagovat čohkke juo 22. geardde filbmadahkkiid ja kulturberošteaddjiid miehtá máilmmi geahččat eamiálbmotfilmmaid. Festivála álgá duorastaga 23.1. ja bistá gitta sotnabeaivái 26.1. Dán jagi temán lea oktavuohta eatnamii. Festivála váldoguossit bohtet Mátta-Amerihkás, earenomážit Perus.

Festivála dáiddalaš jođiheaddji Jorma Lehtola, veahkkebuvttadeaddji Anni Koivisto ja filbmaguovddáš Skábma plánejeaddji Tarja Porsanger addet iežaset filbmaávžžuhusaid Yle Sámi kanálain juohke beaivve dán vahkus.

Neahta lassin ávžžuhusat gullojit rádios beaivválaččat Yle Sámi iđitsáddagis diibmu 7.00–8.00 ja nuppádassii veaigin Dearvva! Tiervâ! Tiõrv! -sáddagis diibmu 14.30–16.00.

Varrasamosat

Muualla Yle.fi:ssä