Sápmi |

Goavvejagi vahátbuhtadusat bisánan stáhta bábermillui – Sámedikki várreságadoalli Leo Aikio gáibida vahátlága ođasmahttima

Eana- ja meahccedoalloministeriija mielde boazojámuid buhtadanášši lea velge gaskan. Sámediggi sávvá stáhtas jođánis mearrádusa.

Leo Aikio
Sámedikki nubbi várreságadoalli Leo Aikio oaivvilda, ahte ášši gieđahallan lea ádjánan áibbas beare guhká. Govva: Vesa Toppari / Yle

Velge ii leat čielga diehtu das, ahte mákságo stáhta boazodolliide buhtadusaid diimmá goavvejagi dagahan vahágiin ja man veardde.

Eana- ja meahccedoalloministeriija ráđđádalli virgeolmmoš Tapani Sirviö dadjá, ahte ášši lea ain ministeriijaid gieđahallamis ja politihkalaš proseassa lea gaskan. Sirviö mielde vejolaš buhtadusaid máksimis eai vel muital dađi eanet almmolašvuhtii.

Ášši leamašan jođus jo fargga jagi. Goavvejagi 2019–2020 dihte Suoma eanan- ja meahccedoalloministeriija bijai Luondduriggodatguovddáš Luke čielggadit, deavdágo mannan dálvi heahtedoarjaga kriteraid.

Ministeriija lea čavčča áigge čohkken ovttas guovlohálddahuseiseváldi AVI:iin dieđuid njuovvanmeriin ja mannan čađa maiddái heahtedoarjagiid máksinvuogádaga.

Vel ođđajagimánus ministeriijas árvaledje, ahte doarjagat sáhtašedje leat ohcan láhkai cuoŋo-miessemánus.

Ministeriija evttohan buhtadit guđádasa árvaluvvon dáhpagiin

Sámediggi ja Bálgosiid ovttastupmi leat juo guhkkit áigge vuordán stáhtaráđi mearrádusa buhtadusain.

Sámedikki nubbi várreságadoalli Leo Aikio oaivvilda, ahte ášši gieđahallan lea ádjánan áibbas beare guhká.

– Ferte dušše sávvat, ahte buhtadusat boazojámuin boađášedje dál jođánit sidjiide, geain lea dáidda duođalaš dárbu. Sávvamis eai boađe dušše moalut, muhto dan veardde, ahte das lea mearkkašupmi, dadjá Aikio.

Aikio mielde stuorámus ballu lea dat, ahte ruđat eai reahkká. Sámedikki ja Bálgosiid ovttastumi dieđuid mielde stáhta áiggošii boazovahátlága bokte buhtadit dáhpagiid birrasiid 3,5–4 miljovnna euro ovddas.

Diimmá dálvve dáhpagat leat goit máŋgga geardásaččat dan ektui. Bálgosiid ovttastupmi lea iežas čielggademiin ja gažademiin gávnnahan, ahte diimmá goavvejahki dagahii juobe 23 miljovnna euro sturrosaš vahágiid boazoealáhussii.

– Ferte sávvat, ahte ruhtasupmi das vel loktana. Olu lea gitta politihkalašstivremis, árvala Aikio.

Bálgosiid ovttastumi doaimmajođiheaddji Anne Ollila ii háliidan kommenteret ášši Yle Sápmái.

Aikio: “Áššit heaŋgájit máŋga jagi”

Luke raporttas boahtá ovdan, ahte bálgosat árvvoštallet váile 15 000 bohcco jápmán diibmá. Muohta lei olu ja das ledje maiddái gaskkas jiekŋagearddit hehttemin guohtuma. Juos boazu olahii guohtut, bodni sáhtii leat báikkuid jikŋon dahje guhppon. Bálgosiid mielde barggut ja lassebiebmamii geavahuvvon fuođđariid mearri šadde measta guovttegeardásažžan.

Vaikko dál eallit jo ođđa giđa, de diimmá goavvejahki dovdo ain badjealbmáid burssas. Sámedikki nubbi várreságadoalli Leo Aikio oaivvilda, ahte dálá boazovahátláhka ii doaimma ja dan galggašii ođasmahttit.

– Gal dan lága ferte rievdadit. Dál dat lea dakkár, ahte áššit bázahallet. Galggašii beassat dasa, ahte sáhtašii ovddal gihtii jo reageret ja doaibmat dan mielde. Dat livččii rievttes geaidnu, iige nu, ahte áššit heaŋgájit máŋga jagi, dadjá Aikio.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä