Sápmi |

"Gollegiella-bálkkašumi sáhtášii juohkit juohke jagi"

Mannan bearjadaga Mikael Svonnii, Kerttu Vuolabii ja Seija Sivertsenii geigejuvvon Davviriikkaid sámegiela bálkkašupmi Gollegiella juhkkojuvvo juohke nuppi jagi. Norgga ja Suoma sámedikkiid presideanttat suokkardallet, ahte bálkkašumi sáhtášii juohkit juohke jagi.

Helssega ministtarčoahkkin 21.11.14.
Davviriikalaš Gollegiella-bálkkašupmi juhkkojuvvui bearjadaga Helssegis sámeministtarčoahkkima oktavuođas. Govva: Vuoigatvuohtaministeriija

Mannan bearjadaga Mikael Svonnii, Kerttu Vuolabii ja Seija Sivertsenii geigejuvvon Davviriikkaid sámegiela bálkkašupmi Gollegiella juhkkojuvvo juohke nuppi jagi.

Norgga ja Suoma sámedikkiid presideanttat suokkardallet, ahte bálkkašumi sáhtášii juohkit juohke jagi.

– Mun lean gal jearran min oktasaš čoahkkimis, ahte go jo leat nu olu buorit kandidáhtat, de galggašeimmetgo geiget bálkkašumi jahkásaččat. Dat lea dieđusge illudahtti, ahte nu máŋgasat ánssašit dán bálkkašumi. Muhto mii árvvostallat dál vuos guokte jagi dán dárbbu, muitala Norgga sámedikki presideanta Aili Keskitalo.

Suoma sámedikki ságadoalli Klemetti Näkkäläjärvi dadjá, ahte Gollegiella-bálkkašumi juohkin juohke jagi sáhtášii loktet dan árvvu.

– Dat sáhttá leat nu, ahte mis nohket dat bálkkašuvvon olbmot, go dat galget álo juogadit bálkkašumi. Bálkkašumi mearkkašumi sáhtášii loktet nu, ahte dat sáhtálii juhkkojuvvot ovtta olbmui ain háválassii ja vehá dávjjibut. Dalle dat livčče seailut dat bálkkašumi alla árvu, Näkkäläjärvi dadjá.

"Dat lea iešalddes kulturdahkku go bargá unnitlogu gielain ja kultuvrrain"

Aili Keskitalo oaidná, ahte Gollegiela-bálkkašumi bokte sáhttá loktet giellabarggu árvvu maid mánáid ja nuoraid čalmmiin.

– Mu mielas otná geigejupmi govve dan, ahte mis leat máŋgasat, geat hui áŋgirit ja máŋga jagi čađa leat bargan ovddidan dihte sámegiela. Mu mielas lei hui buorre, go dát olbmot ožžot dan ánssašumi: gielladutki, nuortalašgiela oahpaheaddji ja girječálli. Dát govve hui bures govdadaga sámegiela barggus, Keskitalo dadjá.

Gollegiela árvu lea dovddastusas iigenuge ruđas, oaivvilda Klemetti Näkkäläjärvi.

– Mun jáhkán, ahte bálkkašuvvon olbmui lea stuorra árvu das, ahte lea ožžon dakkár Gollegiella-bálkkasumi. In mun jáhke dat ruhta nuge lea nu stuorra ášši. Dat lea eambbo juste dat, ahte oažžu dovddastusa. Ruhtagažaldat lea ruhtadeaddjistáhtaid duohken. Jos veardida eará bálkkašumiide, de ii Gollegiella leat dieđusge mihkkege stuorra ruđaid olbmo nala, ahte dien sáhtášii dieđusge smiehttat. Dat lea iešalddes kulturdahkku go bargá unnitlogu gielain ja kultuvrrain, dat lea rahčamuš jo iešalddes, Näkkäläjärvi dadjá.

Varrasamosat: Sápmi

Váldoođđasat

Varrasamosat

Muualla Yle.fi:ssä