Sápmi |

Gollegiella-bálkkašupmi Svonnii, Vuolabii ja Sivertsenii

Davviriikalaš sámegiela bálkkašupmi Gollegiella juolluduvvui bearjadaga Helssegis oahpaheaddji ja dutki Mikael Svonnii, girječálli Kerttu Vuolabii ja oahpaheaddji Seija Sivertsenii. Gollegiella-komitea ságadoallin lei dán háve emeritusprofessor Pekka Sammallahti ja bálkkašumi geigii Suoma vuoigatvuohtaministtar Anna-Maja Henriksson.

Gollegiella 2014: Sivertsen, Vuolab, Svonni
Davviriikalaš sámegiela bálkkašupmi Gollegiella juolluduvvui bearjadaga Helssegis oahpaheaddji Seija Sivertsenii (gur.), girječálli Kerttu Vuolabii ja Helssegis oahpaheaddji ja dutki Mikael Svonnii. Govva: Vuoigatvuohtaministeriija

Davviriikalaš sámegiela bálkkašupmi Gollegiella juolluduvvui jagis 2014 oahpaheaddji ja dutki Mikael Svonnii, girječálli Kerttu Vuolabii ja oahpaheaddji Seija Sivertsenii.

Gollegiella-komitea ságadoallin lei dán háve sámegiela ja -kultuvrra emeritusprofessor Pekka Sammallahti ja komiteas ledje lahttut Norggas, Ruoŧas, Suomas ja Ruoššas.

– Davvisámegiela oahpaheaddji ja dutki Mikael Svonni bálkkašuvvo guhkesáigásaš barggustis davvisámegiela ovdii Ruoŧa bealde. Girječálli Kerttu Vuolab ánssaša bálkkašumi barggustis davvisámegiela čáppagirjjálašvuođa ovddideaddjin. Nuortalašgiela oahpaheaddji Seija Sivertsen ánssaša bálkkasumi eallinbarggustis nuortalašgiela, nuortalaš kultuvrra ja nuortalašservoša ovdii, komitea ákkastallá.

Gollegiella-bálkkašupmi juhkkojuvvo juohke nuppi jagi priváhtaolbmui dahje servošii Norggas, Ruoŧas, Suomas dahje Ruoššas sámegiela ovddideamis.

Bálkkašupmi juhkkojuvvo dál guđat geardde ja dat lea 15 000 euro.

Giellabálkkašumi ulbmilin lea veahkehit sámegiela seailuma ja ovddideami.

Gollegiella-bálkkašupmi juhkkojuvvui dán háve davviriikkaid sámeministtariid ja sámedikkiid presideanttaid deaivvadeamis Helssegis. Bálkkašumi geigii Suoma vuoigatvuohtaministtar Anna-Maja Henriksson.

Varrasamosat: Sápmi

Váldoođđasat

Varrasamosat

Muualla Yle.fi:ssä