Sápmi |

Gosa báhce sámebustávat? Soađegili ođđa buresbirgenguovddáža oahpistanteavsttaid áigot divvut

Soađegili buresbirgenguovddáš Sopukka šilttain váilot ovdamearkka dihte č- ja đ-bustávat, muhto áššis ii lean hoavddas diehtu ovdal.

Sopukka, Soađegilli, šilta
Dán Sopukka oahpistanšilttas goit golbma sánis eai leat buot dat bustávat, mat galggaše. Govva: Eila Laiti

Vuohču ássi Eila Laiti finai gieskat Soađegili ođđa buresbirgenguovddáš Sopukkas. Doppe son deaivvai oaidnit amas sániid, dego ovdamearkka dihte bargodearvvasvuoafuolahus ja oahkkinlanjat.

Buresbirgenguovddáža sámegielat oahpistanteavsttain váilot aŋkke č- ja đ-bustávat. Dan Laiti imaštallá sakka.

– Smihtten, ahte jus suomagillii livčče čállinfeaillat, de eaihan dat oba bijašege daid šilttaid, lohká Laiti.

Laiti imaštallá obalohkái dan, mo šilttat leat váilevaš teavsttaiguin biddjojuvvon oidnosii, iige oktage leat sihkkarastán riektačállima. Su mielas orru, ahte áššái ii leat beroštupmi Soađegilis gieldda beales.

Sopukka, Sodankylä, kyltti, saamenkieli
Ovdamearkka dihte dákkár oahpistanteavsttat leat Soađegili ođđa buresbirgenguovddáš Sopukkas. Aŋkke č- ja đ-bustávat váilot dain sániin, main dat galggašedje leat. Govva: Eila Laiti

Vuođđodorvohoavda čielggadišgođii ášši dalán, go gulai das

Soađegili buresbirgenguovddáš doaibmagođii dán jagi ođđajagimánus. Soađegili vuođđodorvohoavda Harri Tiuraniemi ii diehtán sutnje riŋgedettiin, ahte Sopukka sámegielat teavsttain eai leat buot bustávat nu mo galget. Go gulai áššis, áiggui son dalán bidjat dieđu ovddosguvlui.

– Jus doppe feaillat leat, galgá vuos gávdnat, main oahpistanšilttain dat leat ja dasto daid ferte divvut, dadjá Tiuraniemi.

šilta, Soađegilli, Sopukka
Dalán olgouvssa guoras leat muhtin teavsttat čállojuvvon veaháš endorii. Govva: Eila Laiti

Tiuraniemi muitala, ahte giddodaga fuolaheamis vástida YIT, muhto gielda fas iežas beales vástida oahpistanšilttaid riektačállimis.

Son lea maid dan oaivilis, ahte lea dehálaš čielggadit, manin ja mo ná lea beassan dáhpáhuvvat.

Laiti: "Lea gal sivva divvut"

Eila Laiti suokkardallá, ahte manin sámegielat oahpistanteavsttaid jorgaleapmái ii leat geavahuvvon jorgalanveahkki dahje oktage ii leat dárkkistan loahppabohtosa. Lešgo fonta dakkár, mas dihto bustávat eai oidno.

Son lea goit duđavaš dasa, ahte gielda lea dál váldán ášši barggu vuollái.

– Buorre jus divvot, lea gal sivva divvut, dadjá Eila Laiti.

Varrasamosat: Sápmi

Váldoođđasat

Varrasamosat

Muualla Yle.fi:ssä