Sápmi |

Govvačájáhusainis čájeha máilbmái, ahte sámekultuvra ii leat dušše čáppa govat – “Háliidan doarjut min sámi nuoraid”

Jovnna-Ándde-Arvi-Tomi, Tomi Guttorm ođđa govvačájáhus lea oaidnimis Sámemusea Siiddas gitta golggotmánu álgui.

Tomi Guttorm čájáhus
Govva: Mikkâl Morottaja / Yle

Jovnna-Ándde-Arvi-Tomi, Tomi Guttorm čuovgagovvačájáhus "Gal mii birget" rahppojuvvui odne gaskavahkko Sámemusea Siiddas Anáris. Čájáhusastis Guttorm lea guorahallan sámi servoša áitagiid, mat bohtet olggobeale sámekultuvrra. Earenomážit Guttorm háliida čájáhusainis doarjut sámi nuoraid, geat šaddet dálá servodagas garra deattu vuollái.

– Mun lean váldán mielde nuoraid, go háliidan čájehit, ahte nuorain lea min boahttevuohta. Háliidan buktit daid nuoraid oidnosii, geat barget sámi kultuvrra sisdoaluin, dadjá Guttorm.

Čájáhusa ulbmilin lea oažžut geahčči smiehtastit, makkár hástalusaiguin sápmelaččat heibot. Guttorma govain oidno sámiid árgabeaivi ja dat mo olbmot barget.

– Hui dávjá go geahččá čájáhusaid, de dat leat čáppa govat eatnamiin ja guovssahasain. Mun háliidan buktit ovdan maiddái dan nuppi beali. Makkár hástalusat mis leat juste dál min servodagas ja maiddái davviriikkain. Sámekultuvra ii leat dušše čáppa govat.

– Dan dihte mun háliidan doarjut min nuoraid. Go lean maiddái psykologa, de mun háliidan juste doarjut sin ja sihkkarastit, ahte sis lea dakkár fierpmádat, mii sáhtášii veahkehit hástalusaiguin,, smiehtada Tomi Guttorm.

Tomi Guttorm näyttely
Tomi Guttorm háliida govvačájáhusainis čalmmustahttit sámi nuoraid hástalusaid. Govva: Mikkâl Morottaja / Yle

“Ii dárbbaš okto birget”

Govvačájáhus riegádii oahppomateriálabarggu bokte. Tomi Guttorm bargá beaivválaččat Oulus oahpaheaddjiallaskuvllas ja oahpaha boahttevaš oahpaheaddjiid. Go fuomášii, ahte oahppit eai dieđe maidege sápmelaččaid birra, de ráhkadišgođii oahppomateriála.

Eanaš govaid Guttorm lea govven Deanuleagis, muhto lea geahččalan oažžut maiddái eará guovllu sámiid mielde.

Tomi Guttorm
Tomi Guttorm fuomášii, ahte dárbbaša oahppomateriála sámiid birra iežas barggus ja de álggii govvet ja filbmet. Govva: Mikkâl Morottaja / Yle

Govvačájáhusa temá “birgen” gal lea sápmelaččaide oahpis.

– Dathan lea dakkár vuohki, man gal sápmelaččat dovdet, ahte mii fertet birget. Ieš lean smiehttan, ahte leago dat álot positiivvalaš ášši, ahte ferte dušše birget. Gal mun jáhkán, ahte muhtumin sáhttá leat dakkár dilli, ahte ii dárbbaš okto birget, ahte earát sáhttet veahkehit, jurddaša Guttorm.

Gal mii birget -čájáhus lea oaidnimis Sámemusea Siiddas 8.5.–6.10.2019.

Varrasamosat: Sápmi

Váldoođđasat

Varrasamosat

Muualla Yle.fi:ssä