Sápmi |

Goziiga ja hárjehalaiga ija amas vuoittáhallat avvillaččaide – Ohcejoga ja Avvila nuorat oahpásmuvve NHL-spealu bokte

Speallandáhpáhusaid bokte galget guovtti gieldda nuorat oahpásmuvvat ja seammás sidjiide fállet sámegielat nuoraiddoaimmaid.

Video: NHL-spealus govva.
Avvil

Speallanstivrraniid beare spoahkuhit ja šearpmas roattain jođihit skearru nuppi joavkku moala guvlui. Duo dá geahččit huikkádit ja doškot gieđaid oktii.

Anára ja Ohcejoga nuorat gávnnadedje Avvilis filbmateáhteris ja gilvaledje NHL-spealu vuoittus. Deaivvadeamis lea čiekŋalut ulbmil go dušše speallan, muitala Tuuli Miettunen, guhte bargá Sámedikki nuoraidráđi De-prošeavttas.

– Min prošeavttas mii geahččalit gávdnat vugiid dasa, ahte makkár dat sámegielat nuoraid doaibma sáhtášii leat ja makkár sámegielat astoáiggedoaimmaid nuoraide sáhtášii ordnet.

– Dát lea okta vuohki, maid mii dál geahččalat ovttas Anára ja Ohcejoga gielddaiguin ja searvegottiin, čilge Miettunen.

Isak Pieski ja Nils Máhtte Lukkari speallamin NHL-spealu Avvilis.
Isak Pieski ja Nils Máhtte Lukkari speallamin NHL-spealu Avvilis. Govva: Vesa Toppari / Yle

Ija hárjehallan amas vuoittáhallat

Ohcejohkalaš Nils Máhtte Lukkari ja gáregasnjárgalaš Isak Pieski speallaba joavkun Avvila vuostá. Guktot liikoba NHL-spellui ja leaba čađahan geainnus gitta loahppagilvui.

Čalbmečiegain eai báitte nahkárat, vaikko leabage ija gohcán.

– Na moai letne hárjehallan, ahte birgejetne buorebut go ikte, čilge Pieski.

Lukkari mieđiha, ahte hárjehallamis lei ávki vaikko sudno vuoitimii ii jáhkege.

– In jáhke, ahte vuite. Avvillaččain leat nu buorre speallit, smiehtada Lukkari.

Dihtorspeallu orru álki, dušše deattašit boaluid, muhto iihan dat leat nu. Lukkari ja Pieski oahpaheaba speallama, muhto jođánit čielgá, ahte roattain časkimiige dárbbašuvvojit háhppilis suorpmat.

Ohcejoga gieldda sámegielat nuoraidbargi Aleksi Ahlakorpi lea reisen Avvilii logemat Ohcejoga nuorain. Su mielas dákkár dáhpáhus doarju bures sámegiela.

– Mii hállat olles áigge dáppe sámegiela, dadjá Ahlakorpi.

– Váidalahtti duonge spealu ii oaččo sámegillii, ferte birget dainna ahte dat lea eaŋgalasgillii. Dalle go doppe EA-sporttas (spealu ráhkadeaddjit) gullet mo Ohcejohka lea birgen, de boahtá čuovvovaš jahkái sámegielat "änäri", leaikkastallá Ahlakorpi.

Govas gurot ravddas silbajoavku, Nils Máhtte Lukkari ja Isak Pieski, guovdu golli vuoitán Joona Pohjoisvirta ja Veikko Heikkilä, olgeš ravddas bronsajoavku Jiri Niemelä ja Riku Kumpula.
Govas gurot ravddas silbajoavku, Nils Máhtte Lukkari ja Isak Pieski, guovdu golli vuoitán Joona Pohjoisvirta ja Veikko Heikkilä, olgeš ravddas bronsajoavku Jiri Niemelä ja Riku Kumpula. Govva: Kaija Länsman / Yle

Nuorat vurdet jo ođđa speallandeaivvadeami

Bronsagilvui beassan avvillaččat Jiri Niemi ja Riku Kumpula liikuiba dáhpáhussii.

– In leat oahpásmuvvan ohcejohkalaččaide, lihkká dát lei somás dáhpáhus, nanne Niemi.

Kumpula lea leamašan roahkkat.

– Gal mii moadde sáni leat molson. Somámus goit lea ovttas speallan. Livčče somá, jus dákkár ordnejuvvo ođđasitge, sávvá Kumpula.

Heikkilä ja Pohjoisvirta vuittiiga pokála man oažžuba vuoruid mielde doallat ruovttus.
Heikkilä ja Pohjoisvirta vuittiiga pokála man oažžuba vuoruid mielde doallat ruovttus. Govva: Kaija Länsman / Yle

Loahpas gilvvu vuittii Avvila joavku, mas spealaiga Veikko Heikkilä ja Joona Pohjoisvirta. Vuoittu maŋŋá leigga dieđusge duđavaččat, muhto báziiga vuordit jo ođđa dáhpáhusa.

– Dán dáhpáhusas lei buorre idea, rábmo Pohjoisvirta.

– Dát lei dakkár somás gielddaid gaskasaš dáhpáhus mas beasai ovttas speallat, govvida Heikkilä dáhpáhusa.

De-prošeakta lohpádaddá ođđa dáhpáhusa

Speallandáhpáhusa ordnejedje dál vuosttas geardde, ja nuorat ieža ledje sávvan dakkára. Vaikko eai dal nu šoambbisge vel gaskaneaset, de okta mihttu lea dievvan.

– Dáthan lea gilvu ja sii spellet vuostálagaid, de eai dat vel dán muttus leat buoremus ustibat. Gal sii leat oahpásmuvvan, dien láhkai lea somá oaidnit, mojohallá Miettunen.

Dákkár dáhpáhus jáhkkimis ordnejuvvo nuppe hávege.

– Doaivvu mielde joatkašuvvá. In dieđe leago dat dalle juste NHL-speallu, vai livččego mii nu eará spealuid. Leago dat čuovvovaš dáhpáhus Avvilis vai Ohcejogas, dange ferte smiehttat, loahpaha Miettunen.

Varrasamosat: Sápmi

Váldoođđasat

Varrasamosat

Muualla Yle.fi:ssä