Sápmi |

Greenland Eyes-johtti filbmafestivála hálida bohciidahttit ságastallama

Filmmaiguin sáhttá buktit áššiid ovdan ja bohciidahttit ságastallama. Nu jurddašit Greenland Eyes filbmafestivála ordnejeaddjit. Kalaallit Nunaata, Ruonáeatnama filmmat johtet miehtá Davviriikkaid. Festiválas leat leat filmmat máŋggalágan filbmadahkkiin, muitala festivála jođiheaddji Ivalo Frank.

Video: Yle Ođđasat 21.11.14
Video
Video: Yle Ođđasat 21.11.14 (álgá áiggis 1:27)

Kalaallit Nunaata, Ruonáeatnama filmmaid sáhttá oaidnit Anáris dál vahkkoloahpas Greenland Eyes johtti filbmafestiválas. Festiválajođiheaddji Ivalo Frank bijai iežas bargoáiggis golbma mánu dušše beare ruhtaohcamušaid dahkamii ja dat gánnehii. Sii johtet filmmaiguin, inuitmusihkain ja dánsumiin miehtá Davviriikkaid. Festiválain sii hálidit viiddidit dieđu Kalaallit Nunata birra ja seammás bohciidahttit ságastallama.

– Mii fal geahččalit veháš ságastallat historjjá ja filmma birra ja min rollas máilmmis ja makkár boahttevuohta sáhtašii leat. Mii maid geahččalit dahkat dan vehá politihkkálažžan, daningo leat nu olu  ságastallamat Ruonáeatnama birra ja mii dáhpáhuvvá lundui ja olbmuide, lohká Ivalo Frank.

Ivalo Frankis lea festiválas mielde filbma “Echoes”,  2010, mii muitala vuosttas nisson rumbudánsáris. Son jámii guokte jagi dassái. Son lei hui earenomáš ja nana nisu, lohká Frank. Son lea maid aiddo geargamin ođđa filmmain. Filmma fáddan lea soabadallan, eaŋgasgillii ‘reconsiliation’.

– Mu filmmain lea álo gažaldat vehá nugo “eallimis ja jápmimis”. Fáttat bohtet mu vásáhusaid ja beroštumiin, muhto geahččalan giehtadallat daid nu, ahte dain lea mearkkašupmi maid viidásut oktavuođain, universálalaččat, muitala Ivalo Frank.

– Lea somá ja miellagiddevaš boahtit deike davas čájehit filmmaid. Kalaallit Nunaata olnmuin ja sápmelaččain leat olu seammalágan áššit. Leange álo hálidan boahtit deike, go gullen jo mánnán, ahte dáppe lea Ivalo-nammasaš gilli, čaibmá Frank.

Kalaallit Nunaata vuosttas guhkes filbma jagis 2008

Jos veardida olu eará riikkaide, de filbmabuvttadeapmi Kalaallit Nunaatas lea oalle nuorra. Ivalo Frank lea maid ieš filbmadahkki ja son lohká, ahte dilli ii leat liikkáge nu vearrái. Filmmaid dahkamii mieđihuvvo jahkásažžat vádjit miljon Dánmarkku kruvnnu (DKK) ja Kalaallit Nunaata olmmošlohku lea guittotge viehka unni. Filbmadahkkit leat maid hui aktiivalaččat.

– Vuosttas guhkes filbma dahkkui jagis áibbas smávva ruđaiguin 2008, muhto filbmadahkkit leat hui aktiivalaččat. Nuorra filbmadahkkit skuvlejit iežaset eará riikkain ja de máhccet ruoktot. Nuorra filbmadahkkit dahket olu filmmaid ja bidjet daid omd. You Tubii, internehttii, lohká Frank.

Festiválas mielde maid musihkka ja eará dáidda

Greenland Eyes filbmafestiválas sáhttá filmmaid ja filbmadahkkiid lassin oaidnit govaid ja  gullat Kalaallit Nunaata beakkán musihkkára Simon Lynge. Sotnabeaivve sáhttá oassálastit maiddái vuoiŋŋalaš rituálavázzimii, man ordne J&K performansajoavku.

Festivála leamašan Tanskkas, Islanddas ja Färsulluin. Filmmat ledje mielde maid Arktista Vimmaa-festiválas Roavvenjárggas. Anárii filbmafestivála bođii Stockholmmas ja joatká mátkki Osloi.

Festiválas lea mielde maid ee. Mike Magidson “Inuk”-filbma, mii lei nammaduvvon Oscar-gilvui 2012 ja lea vuoitán máŋggaid bálkkašumiid. Filbmafestivála programma gávno dáppe .

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä