Sápmi |

"Guhkes ja girjás mátki" – Niillas Holmberg ja Roope Mäenpää maŋimuš konsearta lávvardaga

Niillas Holmberg oaivvilda, ahte vaikko duo heaitin bohciidahttá olu muittuid, ii boarrásiidda galgga menddo sakka roahkkasit.

Niillas Holmberg ja Roope Mäenpää
Niillas Holmberg ja Roope Mäenpää duo lea čuojahan konsearttaid jo logi jagi. Govva lea váldon 2013. Govva: Tuupa Records

Niillas Holmberg ja Roope Mäenpää duo loahpaha dán vahkoloahpas jahkelogi bistán mátkkis. Duo doallá maŋimus konsearttas lávvardaga 25.5.

Nuppelot jagi dassái Niilas Holmberg ja Roope Mäenpää gávnnadeigga Tamperes, Mátta-Suomas. Holmberg vulggii 16-jahkásažžan Ohcejogas Tamperei dáiddalogahahkii, ja Mäenpää deaivvai suinna seamma luohkkái. Doppe dat álggii, sudno oktasaš musihkkaprošeakta.

Duo álggahii konsearttaid čuojaheami logi jagi dassái Anáris, ja dál maiddái loahpaha doppe. Logi jahkái čáhket ollu iešguđetlágán fearánat, ja Holmberg atnáge dán mátkki dehálažžan.

– Dat lea leamaš gal guhkes ja girjás mátki. Olu somás áššit, olu oktavuođat ja olu oahppan. Dathan lea mu láddadan olu eará musihkkabargguide ja dáiddalaš ovttasbargguide, mat mus leat das maŋŋá boahtán.

Holmberg muitala, ahte dál lea earenoamáš dovdu, go duo lea heaitimin.

– Dat lea dieđusge dat mu vuosttaš albma musihkkaprošeakta, ja hirbmat dehálaš prošeakta leamašan dego dáiddárin ovdáneami dáfus ja sihkkarit maiddái olmmožin čálgama dáfus. Gal dat olu bohciidahttá muittuid, muhto somá liikká, jurddaša Holmberg duo heaitima birra.

Niillas Holmberg
Dáiddár Niillas Holmberg muittaša, ahte duo logi jahkái leat čáhkan ollu iešguđetlágán fearánat. Govva: Linnea Rasmus / Yle

"Eallin ovdána"

Niillas Holmberg muitala, ahte sus leamaš jo muhtin jagi dakkár dovdu, ahte ii háliit šat seamma lávlagiid čuojahit. Iige dat leat goittotge loahppa sudno ovttasbargui, soitet jo ođđa prošeavttat vuordimin.

– Dat lea eanetge juste dan duoi ja dan prošektii ja lávlagiidda dahkat dearvvuođaid. Moai háliideimme vel oktii addit olbmuide, geat dal háliidit gullat, addit sidjiide vejolašvuođa gullat daid lávlagiid.

Sus lea maiddái jurdda das, manin dolkkai seamma lávlagiidda.

– Mun lean leamaš várra álo dakkár, gii háliida iskat ođđa áššiid. Mun goittot in álgge čuojahit ovtta lávlaga máŋgalot jagi, mun lean dego geargan jo daiguin. Eallin ovdána ja eallin eallá, ii dat galgga roahkkasit menddo sakka boarrásiidda, smiehtada Holmberg.

Guldal dás Niillas Holmberga jearahallama duorastaga 23.5. Sohkaršohkas. Jietna: Yle Areena.

Niillas Holmberg ja Roope Mäenpää lea almmustahttán guokte skearru Tuupa Records -skearrofitnodaga bokte. Skearru Manin guottán girjji fárus almmustuvai jagis 2011 ja Assimilašuvdna blues fas jagis 2014. Duo loahpahankonsearta lea ihttin lávvordaga Anáris kulturguovddáš Sajosis.

Varrasamosat: Sápmi

Váldoođđasat

Varrasamosat

Muualla Yle.fi:ssä