Sápmi |

Guldal jiena: 13 olbmo váldigohtet Ketterä allaskuvlla pedagogalaš oahpuid

Prošeaktakoordináhtor Tiina Mattanen muitala, ahte sii geahččalit ordnet oahpuid nu olu lagašoahpahussan, go vejolaš.

Oulun yliopisto
Ketterä allaskuvla lea sihke Oulu universitehta Giellagas -instituhta ja šaddandiehtaga dieđagotti fidnu, mii doaibmá lagaš ovttasbarggus ovdamearkka dihte Sámi oahpahusguovddážiin. Govva: Timo Nykyri / Yle

Ketterä allaskuvla -fidnu oahppojahki álgá fargga. Dán háve fidnu bokte fállet pedagogihka oahpuid ja maid girjjálašvuođa oahpuid. Ketterä fállá oahpuid olbmuide, geat háliidit oahpahit sámegiela dahje sámegillii.

Ketterä allaskuvlla bokte leat diibmá stuđeren davvisámegiela, anárašgiela ja nuortalašgiela vuođđo- ja ávnnasoahpuid. Geassemánus oahpuin gerge davvisámegiela oasil 14 oahppi, anárašgielas logis ja nuortalašgielas gávccis.

Ohcanáigi pedagogalaš oahpuide lei giđđat ja sisabeassaniskosat ledje geassemánu álggos. Oktiibuot 13 olbmo besse sisa iskosiid bokte, muitala prošeaktakoordináhtor Tiina Mattanen.

Plánan lea ordnet oahpahusa eanas osiin lagašoahpahussan Anáris, muhto muhtin oassi oahpuin lea gáiddusin. Maiddái koronadilli váikkuha dasa, mo oahpahus ordnašuvvá ja dili čuvvot olles áigge.

– Galgat plánet oahpahusa nie, ahte dárbbu mielde sáhttit ordnet oahpahusa eambbo gáiddusin, lohká Mattanen.

Ketterä allaskuvla -fidnu lea Oulu universitehta Giellagas-instituhta ja pedagogihka diehtaga dieđagotti fidnu, mii doaibmá ovttasbarggus Sámi oahpahusguovddážiin, Sámedikki skuvlen- ja oahppomateriáladoaimmahagain ja sámegielddaiguin. Dan ruhtada oahpahus- ja kulturministeriija.

Tiina Mattanen lea prošeaktakoordináhtorin Ketterä allaskuvla -fidnus. Son muitala, das, mo sii áigot ordnet doaimma ja man gallis dán jagi ohcet. Doaimmaheaddjin Tuomo Laiti. Jietna: Tuomo Laiti

28.7.2020 dii. 16.34 bajilčála ja ášši dárkkálmahtton.

Varrasamosat: Sápmi

Váldoođđasat

Varrasamosat

Muualla Yle.fi:ssä