Sápmi |

Guldal jiena: Ailu Valle ja Amoc almmustahtiiga ođđa siŋgela – oktasaš skearru gárvána boahtte jagi

Ailu Valle ja Amoc ođđa skearru vuosttaš bihttá ja musihkkavideo "Horagállis" almmustuvai odne.

Horagállis
Amoc ja Ailu Valle leaba bargamin oktasaš skearruin. Govva: Robin Francett

Sámi rap-artisttat Ailu Valle ja Amoc nappo Mikkal Morottaja leaba ovttasbargamin ođđa skearru. Soai eaba leat áibbas vuosttas háve ovttasbargamin, go sudnos leat almmustuvvan ovdalge ovttaskas oktasaš bihtát. Boahttevaš oktasaš skearru vuosttaš bihttá almmustuvai odne ja dat lea oassi stuorát skearru ollisvuođas. Ođđa skearru almmustahttojuvvo boahtte jagi bealde, go dat gárvána.

Ailu Valle mielde ođđa bihtás Horagállis lea muitalus duogábealde. Bihtá musihkkavideo lea maid oaidninláhkai Youtubes.

– Dan bihtá namma lea Horagállis, de dat lea nugo bajána ipmil ja dat bihttá muitala hui oanehaččat olbmo siskkáldas dola birra, dadjá Ailu Valle.

Dán ođđa bihttái Amoc ja Ailu Valle leaba geavahan eanet áiggi go dábálaččat, ovdalgo leigga duđavaččat loahppabohtosii.

Musihkkavideo lea govven ja čuohppan govvejeaddji Ville-Riiko Fofonoff. Neavttárin musihkkavideos lea Pekka Aikio. Musihkkavideo guovddáš elemeantan lea dolla ja videos lea uhca máinnas.

Ođđa skearru bihtát vuođđuduvvet muitalusaide ja máidnasiidda

Amoc ja Ailu Valle leaba guhká bargan dáinna albumain ja dat álgá leat dál gulul buori muttus. Skearru lea dainna lágiin erenoamáš ja áidnalunddot, ahte bihtáid vuođđun leat muitalusat ja máidnasat. Muitalusat sáhttet leat árbevirolaččat, muhto bihtát gieđahallet maiddái historjjálaččat sápmelaččaide mearkkašahtti dáhpáhusaid.

Ođđa musihkka sáhttá leat hárjánan guldaleaddji bealljái vehá earálágan, go maid leat ovdal gullan Amocis ja Ailu Valles. Ailu Valle govvida, ahte musihkka lea dan láhkai earálágan, ahte das leat eanet persovnnalaš teavsttat.

– Dan olles albuma idea lea dat, ahte das leat muitalusat ja máidnasat guovddážis. Dán bihtás lea dieđusge maiddái fiktiivvalaš bealli seaguhuvvon, ahte dat lea maiddái muitalus-hámis, muitala Ailu Valle.

Sámi rap-artisttat Ailu Valle ja Amoc almmustahttiba ođđa musihkkabihtá ođđajagiruohta 31.12.2020. Musihkkabihtá namma lea Horagállis ja dat lea okta bihttá boahttevaš skearrus, man soai almmuheaba anáraš- ja davvisámegillii. Skearrus bihtáin lea duogážiš juoga muitalus dahje máinnas. Ná Ailu Valle muitala skearru ja ovttasbarggu birra. Jietna: Inger-Elle Suoninen / Yle

Jurdda vulggii eará prošeavtta áigge

Ailu Valle mielde su ovddit skearru Viidon sieiddit -bargojoavkku jođiheaddji, Lappi Universitehta sámedutkamuša professor, Sanna Valkonen evttohii joatkit ovttasbarggu, mas ovttastuvvet dutkan ja dáidaga ráhkadeapmi. Nuba Ailu Valle jearai Amoc mielde prošektii.

– Moai dalle mearrideimme, ahte moai heivehetne dán prošektii dan maid moai leimme juo ovdalis smiehttan, ahte moai ráhkadetne olles albuma vuosttas háve nu, ahte das lea anárašgiella ja davvisámegiella ja dasto dasa bohtet muitalusat dahje máidnasat guovddáštemán, čilge Ailu Valle.

Ovttasbargu lea leamašan vuogas sihke Amoc ja Ailu Valle mielas. Dávjá dáiddáriin sáhttet leat garra oainnut, muhto ovttasbargan lea oahpahan guktuide kompromissaid bargama.

– Dál mii leat dego oahppan eanet bargat ovttas ja dat lea leamaš gal áibbas miellagiddevaš. Ailuin leamaš álki bargat, dadjá Amoc.

Ráppárguovttos jáhkkiba, ahte skearrus šaddá buorre.

– Mun jáhkán dasa bohtet 13 dahje 14 bihtá, dan dál oaidná vel, ahte dat lea proseassa vel gaskan, muhto dán rádjai goittot jáhkán ahte das boahtá hui buorre, dadjá Ailu Valle.

– Jáhkán ahte guktot letne duđavačča goittot dan loahppabohtosii, dadjá Amoc.

Sámi rap-artisttat Amoc ja Ailu Valle almmuheaba oktasaš musihkkabihtá ođđajagiruohta 31.12.2020. Musihkkabihtá namma lea "Horagállis" ja dat lea oassi boahttevaš skearrus, man Amoc ja Ailu Valle leaba bargamin. Amoc muitala skearru birra. Jietna: Inger-Elle Suoninen / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä