Sápmi |

Guldal jiena: Anára duodjemárkaniid lágidit fas lávvordaga jagi bottu maŋŋá – vuovdit leat dušše Suoma beale Sámis

Lávvordaga lágiduvvo maid Camera Borealis -luonddugovvadáhpáhus oktanaga duodjemárkaniin. Duodjemárkaniid oktavuođas lágiduvvo maiddái silbačikŋabargobádji, man oahpaha Petra Biret Magga-Vars.

Marjaana Aikio Sajoksen pihalla
Sámi Duodji -searvvi ságadoalli Marjaana Aikio muitala, ahte Sámi Duodji -searvvi lahtuide lea fállon vejolašvuohta vuovdit iežaset dujiid duodjemárkaniin. Govva: Kirsti Länsman / Yle

Sámi Duodji -searvvi ságadoalli Marjaana Aikio muitala duodjemárkaniin. Jietna: Sáárá Seipiharju / Yle

Jagi bottu maŋŋá besset olbmot fas čáppášit ja oastit dujiid duodjemárkaniidda. Anáris lágidit lávvordaga duodjemárkaniid sámekulturguovddáš Sajosis.

Duodjemárkanat lágiduvvojit oktanaga Camera Borealis -luonddugovvadáhpáhusain, muitala Sámi duodji -searvvi ságadoalli Marjaana Aikio. Dujiid leat vuovdimen Sámi Duodji -searvvi lahtut.

Koronadorvvolašvuođas dáhpáhusas fuolahit máskkaiguin, buorre giehtahygienain ja dorvogaskkaiguin, muitala Aikio.

– Dál dieđusge Norgga bealde eai boađe vuovdit go koronadilli lea viehka váttis dál. Dilli lea dál dákkár.

Pandemiija geažil duodjemárkaniid eai ordnen diibmá, ja dán jagiges vuovdit leat dušše fal Suoma beal Sámis. Lágideaddjit eai máhte vel árvvoštallat, olugo olbmot leat boahtimin márkaniidda.

– Mii vuordit olu, muhto lea hirbmat váttis diehtit, go lea dákkár áigi, ahte man veardde bohtet olbmot, dadjá Aikio ja sávvá buohkaide buresboahtin márkaniidda.

Guovdageainnus ja Kárášjogas ledje maid ordnemin duodjemárkaniid dál skábmamánus, muhto dáhpáhusaid mearridedje sirdit koronadili geažil. Guovdageainnu márkaniid áigot dál lágidit juovlamánus ja Kárášjogas fas boahtte jagi bealde guovvamánus.

Silbačikŋabargobájis beassá duddjot vaikkoba bealječiŋaid

Duodjemárkaniid oktavuođas lea vejolaš maid ieš duddjot silbačikŋabargobájis. Vuođđojurdda lea ahte buohkain, geain lea beroštupmi silbačiŋaide, beasašedje geavahit kreatiivvalašvuođa ja oahpásmuvvat silbaosiide.

Sámi Duodji -searvvi lahttu Petra Biret Magga-Vars oahpaha isidiinnis bargobájis.

– Mii boahtit čájehit doppe mot daid sáhttá laktit osiid oktii ja mis leat muhtun ideat jos olbmot eai boađe gárvvis ideaiguin. Mii leat doppe oahpisteamen ja oahpaheamen.

Petra Magga-Vars
Silbačikŋabargobáji oahpaheaddji Petra Biret Magga-Vars illuda, go lávvordaga lea vejolaš čoahkkanit ovttas duodjemárkaniidda ja bargobádjái. Govva: Linnea Rasmus / Yle

Bargobádjái lea oassálastinmáksu ja maid silbbain ferte máksit sierra. Magga-Vars muittuha, ahte bargobádjái sáhttá buktit silbbaid maid ruovttus.

Bargobájis sáhttá duddjot ovdamearkka dihtii bealječiŋaid dahje giehtabáttiid. Bargobádjái váldet logi oasálasti hávil.

Vuosttaš bargobádji álgá lávvordaga gaskabeai áigge ja bistá beannot diimmu. Juos leat olu oassálastit, de lágiduvvo nubbi bádji, mii álgá kvárta váile guokte.

Guldal maid silbabargobáji oahpaheaddji Petra Biret Magga-Vars muitala lávvordaga bargobájis. Jietna: Sáárá Seipiharju / Yle

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä