Sápmi |

Guldal jiena: Anára ja Ohcejoga rájá alde leat miehtá dološ siidarádjamearkkat – Siidaskuvla finai oahpásmuvvamin daidda Gámasmohki guovllus

Buot siidarádjamearkkat Anára ja Ohcejoga rájá alde eai leat vel gávdnon, muitala Luobbal Jovsset Esko.

vanha siidarajamerkki Utsjoen Kaamasmukassa
Siidaráját leat dolin merkejuvvon bures meahccái ja dat leat maiddái duopmobeavdegirjjiin nannejuvvon, muitala Luobbal Jovsset Esko. Govva: Rauna Kuokkanen / siidaskuvla.net

Anára ja Ohcejoga dološ siidarájás leat ain otnábeaivvege mearkkat Anára ja Ohcejoga rájá alde. Unna joavku Siidaskuvla-prošeavtta olis finai geassemánu loahpas oahpasmuvvamin dáid rádjamearkkaide Gámasmohki-Gákcavári guovllus Ohcejogas Luobbal Jovsset Esko, Esko Aikio oahpistemiin.

– Dieppe guovllus lea siidarádjá Anára ja Ohcejoga siidda gaskkas, dehege muhtin gaskkas dat lei Anára ja Deanu siidarádjá. Dat siidaráját leat dolin merkejuvvon bures dohko meahccái ja dat leat maiddái duopmobeavdegirjjiin nannejuvvon. Mii finaimet daid geahččamin, mat doppe leat dán rádjái gávdnon, muitala Luobbal Jovsset Esko.

Son joatká, ahte Anára ja Ohcejoga rájá alde gal leat miehtá mearkkat, muhto buot eai leat vel gávdnon, daid fertešii vel ohcat. Giehtaruohttasa bealde dat leat oalle muddui dokumenterejuvvon ja govvejuvvon.

Esko Aikio
Luobbal Jovsset Esko ovttas vieljainis lea čielggadan siidarádjemearkkaid dahje -uraid Sámiráđi prošeavtta várás moaddelogi jagi dassái. Govva: Vesa Toppari / Yle

Siidarájáide oahpasmuvvan galggai leat Siidaskuvla-prošeavtta dán gease geassejorggáldat siidaskuvlla deaivvadeapmi, muhto koronaráddjehusaid geažil eai beassan doallat albma siidaskuvlla dán háve.

Vuosttas geassejorggáldat siidaskuvlla deaivvadeapmi ordnejuvvui diibmá Levssejogas. Deaivvadeamis bođii sáhka dološ sámisiiddaid ja daid doaibmavugiin ja maiddái daid rádjamearkkain. Luobbal Jovsset Esko ovttas vieljainis lea čielggadan siidarádjemearkkaid dahje -uraid Sámiráđi prošeavtta várás moaddelogi jagi dassái.

– Doppe meahcis lean vázzán dan rájá viehka muddui moatte geasis ja govven ja merken visot daid rádjamearkkaid, mat gávdnujedje. Gámasmohkis Gámilveainjálbmái min Jovnnain vácciime oktii ja ozaime rádjamearkkaid ja bures doppe gávdnujedje, earet doppe Anárjohleagis ean gávdnan visot mearkkaid, muittaša Aikio.

Luobbal Jovsset Esko mielas dološ siidaortnega sáhtášii muhtun muddui váldit ruovttoluotta atnui otnábeaivái.

– Deháleamos osiin daid sáhtášii geahččalit atnui váldit. Goittotge dan sámi iešmearrideami olis, ahte mii ieža dalle mearridat iežaimet guovlluin eaige eiseváldit nu olu seahkan dasa.

Guldal Luobbal Jovsset Esko jearahallama dás. Jietna: Susanna Guttorm / Yle

Siidaskuvla lea guovttejahkásaš sámedutkiid, -dáiddáriid ja -aktivisttaid oktasaš prošeakta

Kone-foanda juolludii jagi 2018 loahpas 191 400 euro veahkkeruđa Jovnna Jon Ánne Kirstte Rávnná, Rauna Kuokkasii, ja su bargojoavkku Siidaskuvla-nammasaš fidnui.

Bargojoavkku eará lahtut leat Anne-Maria Magga, Oula-Antti Labba, Beaska Niillas, Niillas Holmberg, Aura Pieski, Aslak Holmberg, Asta Balto, Sunna Valkeapää, Suvi West, Tomi Guttorm, Anne Olli, Philip Burgess, Kirste Paltto, Jenni Laiti ja Petra Laiti.

Dán guovttejahkásaš sámedutkiid, -dáiddáriid ja -aktivisttaid oktasaš prošeavtta ulbmilin lea čielggadit siidaortnega mearkkašumi ja vejolašvuođaid otnábeaivve dárbbuid várás. Prošeavttas guorahallet maiddái, mo siida lea doaibman ja makkár oasit das doibmet ain dálá servodagas.

Varrasamosat: Sápmi

Váldoođđasat

Varrasamosat

Muualla Yle.fi:ssä