Sápmi |

Guldal jiena: Anára searvegotti girkohearrá Tuomo Huusko lea ožžon proavásta árvonama

Proavásta árvonama mieđiha bismá.

Inarin kirkkoherra Tuomo Huusko
Bismá lea nammadan Anára searvegotti girkohearrá Tuomo Huusko proávastan. Govva: Anneli Lappalainen / Yle

Oulu bismágotti bismá Jukka Keskitalo lea mieđihan proavásta árvonamaid viđa báhppii Oulu bismágottis. Anára searvegotti girkohearrá Tuomo Huusko lea okta dain, guhte lea ožžon proavásta árvonama.

Dasa lassin Durdnosa searvegotti girkohearrá Mirja-Liisa Lindström, Haapajärvi searvegotti kapellána Mika Katajamäki, Ylivieska logahaga rektor, pástor Kalle Luhtasela ja Oulujoga searvegotti girkohearrá Ilkka Mäkinen leat ožžon proavásta árvonama.

Huusko lea ilus dán dieđus.

– Hirbmat buorre dovdu lea, dieđusge mun lean giitevaš ja ilolaš. Ferten gal dadjat, ahte in gal máhttán veháge vuordit, muitala Huusko.

Proavásta lea árvonamma, man bismá mieđiha báhpaide, geat leat erenoamážit bargguinis ánssášan dan. Dákkár árvonamma mearkkaša Huuskoi olu.

– Mun lean oalle guhká bargan báhppan ja daid báhpa bargguid, ja mun ádden dan árvonama nu, ahte dainna lágiin bismá čájeha luohttámuša munnje ja mu bargui, ahte lean dikšon áššiid bures iežan barggus. Dieinna lágiin mun dan ádden, muitala Huusko.

Maŋimuš jagiid Oulu bismágottis leat mieđihan sullii vihtta proavásta árvonama jagis.

Anára searvegotti girkohearrá Tuomo Huusko lea ožžon proavásta árvonama. Guldal dás su jearahallama. Jietna: Tuomo Laiti / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä