Sápmi |

Guldal jiena: Antte Heatta álggaha rádjejeagárkompaniijas: "Lean gullan buriid ságaid Avvilis ja háliidan hástalit iežan"

Otne vuossárgga 120 ođđa soalddátálggu álggahit soahtebálvalusa Avvilis.

Ánte Hetta
Antte Heatta álggaha otne soahtebálvalusa Avvilis. Son vuordá soahteveagas gelddolaš, muhto buorre vásáhusa iežas eallimii. Govva: Kirsti Länsman / Yle

Anárlaš Antte Heatta lea dál orron moadde jagi Roavvenjárggas, muhto mearridii boahtit ruovttoluotta davás soahtevehkii. Sutnje lei čielggas, ahte háliida soahtevehkii Avvila rádjejeagárkompaniijai.

– Lean gullan olu buriid ságaid Avvilis ja háliidan hástalit iežan, go lean gullan, ahte dat lea oalle fysalaš báiki, Heatta muitala.

Heatta jáhkká, ahte soahteveahka lea somás vásáhus, danin go son liiko vánddardit ja lihkadit luonddus. Son lea maiddái viehkan ja sihkkelastán vai lea buorre ortnegis, go lávke rádjejeagárkompaniija poarttas sisa.

– Mun vuorddán daid meahcceleairraid. Lean gullan, ahte datge leat fysalaččat ja sáhttet leat garra dálkkitge.

Vel sus ii leat diehtu, man guhká son soahtebálvalusas lea, dahje maid son doppe galgá bargat. Son lea goittotge luohttevaš mielain.

– Dat čielgá doppe dasto, maid mun dagan ja man guhká lean doppe.

Guldal maid Antte Heatta jurddaša go álggaha otne soahteveaga Avvilis.

Koronadilli váikkuha soalddáhiid luomuide

Antte Heatta soahtebálvalus šaddá leat koronadili dihte vehá earálágan.

Rádjejeagárkompaniija lutnánta Emmi Piltz muitala, ahte koronadilli lea eanemusat váikkuhan soalddáhiid luomuide. Luomut ollašuvvet nu, ahte dat leat guhkibut go dábálaččat, muhto soalddáhat eai beasa lupmui nu dávjá.

– Muđui mii geahččalit ordnet áššiid nu, ahte joavkkut eai leat seammá áigge seammá sajis, son muitala.

Varrasamosat: Sápmi

Váldoođđasat

Varrasamosat

Muualla Yle.fi:ssä