Sápmi |

Guldal jiena: Arvedávgesánit jorgaluvvojit sámegielaide – "Mii dárbbašit daid sániid vai mii sáhttit servodahkan gieđahallagoahtit daid áššiid"

Nuoraidráđđi áigu almmustahttit arvedávgesátnelisttu borgemánus Sápmi pride -dáhpáhusa áigge.

Saamelaiskäräjien nuorisoneuvoston puheenjohtaja Anni-Sofia Niittyvuopio.
Suoma sámedikki nuoraidráđi ságadoalli Anni-Sofia Niittyvuopio oaivvilda, ahte nu arvedávgesápmelaččat go maiddái oba sámeservodat dárbbaša sániid, maiguin arvedávgeáššiin sáhttá hállat. Govva: Vesa Toppari / Yle

Suoma sámedikki nuoraidráđđi lea mearridan jorgalahttit anáraš, -nuortalaš- ja davvisámegillii nu gohčoduvvon arvedávgesániid. Sáhka lea doahpagiin, mat gusket sohkabealle- ja seksuálavehádagaid.

– Mii leat gávnnahan, ahte arvedávgesápmelaččat, muhto maiddái min obba servvodat, dárbbaša sániid, main meroštallat iežaset ja gulahallat nuppiideasetguin. Sániiguin mii lasihit arvedávgesápmelaččaid oktiigullevašvuođa ja min servodaga arvedávgedieđuid, muitala nuoraidráđi ságadoalli Anni-Sofia Niittyvuopio.

Niittyvuopio lea fuomášan, ahte goittotge Suoma beal Sámis nuorat geavahit suomagielsániid arvedávgeáššiin háladettiin. Arvedávgesápmelaš-sátni lea jo máŋgasiidda oahpes sátni sámegillii, muhto nuoraidráđđi háliida, ahte maiddái bearrašiid máŋggahámatvuođa birra leat sánit sámegillii.

– Mii dárbbašit daid sániid vai mii sáhttit servodahkan gieđahallagoahtit daid áššiid ja maid hállat áššiin daid rivttes namaiguin, Niittyvuopio oaivvilda.

Čielggadit vejolašvuođa jorgalit sátnelisttu maid eará sámegielaide

Nuoraidráđđi čielggadišgoahtá dál, sáhtášiigo sátnelisttu jorgalit maiddái Norgga ja Ruoŧa unnitlogu sámegielaide.

– Go mun lean hállán Norgga ja Ruoŧa bealde olbmuiguin dan arvedávgesátnelisttu birra, de doppe lea leamašan beroštupmi maiddái, muitala nuoraidráđi ságadoalli Anni-Sofia Niittyvuopio.

Nuoraidráđi ulbmilin lea almmustahttit arvedávgesátnelisttu borgemánus Sápmi pride -dáhpáhusa áigge. Dálá dieđu mielde čuovvovaš Sápmi pride lágiduvvo Deanuleagis Ohcejogas 5.8. Pride dáhpáhusaid dárkkuhus lea čalmmustahttit seksuálaveahádagaid rivttiid, kultuvrra ja ovttaveardásašvuođa.

Dán jearahallamis nuoraidráđđi ságadoalli Ánne-Sofe Niittyvuopio muitala eanet arvedávgesániid jorgaleamis. Jietna: Sáárá Seipiharju / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä