Sápmi |

Guldal jiena: Aslak Holmberg ja Niillas Beaska deaivvadeaba ST1-fitnodagain – dieđiheaba ahte fitnodat ferte rievdadit bargovugiid

Aslak Holmberg Sámiráđis ja Niillas Beaska Norgga Sámiid riikkasearvvis deaivaba ST1-fitnodaga ovddasteaddjiin bearjadaga. ST1 bieggafámu jođiheaddji Thomas Hansen vuordá deaivvadeami ja ahte beassá gullat detáljaid.

Aslak Holmberg taustanaan Rastigaisan tunturialue.
Holmberg oaidná ahte doaibmavuogit, mat njuolga dagahit riidduid servošis, eai leat riekta. Govva: Vesa Toppari / Yle

Guldal dás Áslak Holmberg jearahallama Jietna: Inger-Elle Suoninen / Yle

Aslak Holmberg Sámiráđis ja Niillas Beaska Norgga Sámiid riikkasearvvis deaivaba odne ST1-fitnodaga ovddasteaddji Helssegis. Sudno ulbmilin lea buktit ovdán, ahte fitnodaga doaibmavuogit eai leat dohkálaččat Rástegáissá davábeallái plánejuvvon bieggamilloáššis.

– Dál leat maid ođđa dáhpáhusat, maid dihte orui dárbu fitnat doppe muitaleame, ahte sii fertejit dál rievdadit sin bargovugiid, muitala Holmberg.

Grenselandet AS, mas suopmelaš bensenfitnodat ST1 lea váldooamasteaddjin, lea juo máŋga jagi plánen hukset stuorra bieggamillopárkka Davvesiidda ja Deanu gieldda rájá ala Rástegáissa lagašguovlluide. Báikki olbmot leat sakka vuostálastán plánaid.

Holbmerg muitala, ahte Grenselandet AS advokáhta lea dál fállan ovttaskas siidalahtuide stuorra ruhtasupmiid, jus doarjugohtet sin bieggamilloprošeavtta. Maiddái Ávvir-aviisa lea čállán dáid čuoččuhusaid birra.

Holmberg oaidná ahte doaibmavuogit, mat njuolga dagahit riidduid servošis, eai leat riekta.

– Deattuhit ahte eai sii sáhte leat mielde diekkár bargovugiin, mat leat njuolgut dagaheamen riidduid olbmuid gaskii, go vikket ovttaskas olbmuid bokte oažžut juolgesaji dohko.

ST1 ovddasteaddji ii muital ságastallamiid detáljaid

ST1-fitnodaga bieggafámu jođiheaddji Thomas Hansen nanne, ahte dákkár deaivvadeapmi lea sohppojuvvon.

– Mii leat dieđusge dohkkehan deaivvadanbivdaga. Mii geahččalit deaivvadit nu máŋgga iešguđet čanusjoavkkuin ja ovddasteddjiin go vejolaš, mat leat aktiivvalaččat servošiin, gos mis sáhttá leat váikkuhus. Min perspektiivvas dát lea bistevaš gulahallan máŋggain čanusjoavkkuin, muitala Hansen.

Son vuordá beassat gullat eanet detáljaid dásis, vai sii sáhttet geahččalit bargat áššiid eará láhkai.

– Mun vuorddán dán deaivvadeami. Ja vai lean dárkil, mii eat dieđusge hálit, ahte mis lea dohkketmeahttun láhtten. Dat ii leat maid mii vikkat. Vuorddán ahte beassat daidda detáljaide, ja jus leat áššit maid mii sáhttit bargat eará láhkai, de mii guldalit ja geahččalit bargat áššiid eará láhkai.

Čuoččuhusaid Grenselandet AS advokáhta doaimmain ja ráđđádallamiin son ii olus kommentere.

– In hálit mannat máŋggaid ságastallamiid dahje ráđđádallamiid detáljaide, mat mis leat iešguđet oassebeliiguin. Muhto nugo lohken, mii geahččalit máŋggain vugiin doallat nu máŋga ságastallama ja gulahallama go vejolaš.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä