Sápmi |

Guldal jiena: Bálgosiid ovttastus nammadii boazomearkaváljagotti – galgá veahkehit eiseválddiid eahpečielga mearkaáššiin

Boazomearkaváljagotti lahtuid nammadedje vai eiseválddit sáhttet váldit sidjiige oktavuođa, jus dárbbašit veahki boazomearkaáššiiguin.

Anne Ollila on Paliskuntain yhdistyksen toiminnanjohtaja.
Bálgosiid ovttastusa doaimmajođiheaddji Anne Ollila. Govva: Vesa Toppari / Yle

Bálgosiid ovttastusa stivra lea mearridan vuođđudit sierra boazomearkaváljagotti, man bargun lea buktit ovdan iežas áššedovdamuša eahpečielga mearkaáššiin ja sierramielatvuođain.

Boazomearkaváljagotti lahtuid nammadedje vai eiseválddit sáhttet váldit sidjiige oktavuođa, jus dárbbašit veahki boazomearkaáššiiguin ovdamearkka dihtii rihkosdutkamis, muitala Bálgosiid ovttastusa doaimmajođiheaddji Anne Ollila.

– Eiseválddiid veahkkin dárbbašit dakkár mearkaáššedovdiid, geat máhttet lohkat mearkkaid maiddái dakkár diliin, main dat gáibida erenoamáš máhtu. Min ovttastusa stivra nammadii miehtá boazodoalloguovllu dakkár olbmuid, geaid dovdat buorre mearkadovdin. Sin namaid sáhttit addit de eiseválddiide, geat sáhttet dárbbu mielde válljet sin joavkkus veahkki alcceseaset.

Bálgosiid ovttastusa doaimmajođiheaddji Anne Ollila muitala, ahte boazomearkaváljagotti lahttun lean nammaduvvon áššedovdit, geaid eiseválddit sáhttet dáhttut dárbbu mielde veahkkin. Jietna: Xia Torikka / Yle

"Dehálaš, ahte lávdegoddi lea vuođđuduvvon"

Boazomearkaváljagotti lahttun leat válljen guokte ovddasteaddji sápmelaččaid ruovttuguovllus, guokte erenoamážit boazodoalu várás dárkkuhuvvon guovllus, guokte Mátta-Lappi guovllus ja guokte vel máttimus boazodoalloguovllus.

Ovddasteaddjit leat Hannu Ranta Neakkela bálgosis, Tuomas Semenoff Váhčira bálgosis, Kauno Rytkönen Kuivasalmi bálgosis, Raimo Hannuniemi Kemin-Sompio bálgosis, Veikko Heiskari Poikajärvi bálgosis, Martti Siivola Oraniemi bálgosis, Mika Käsmä Taivalkoski bálgosis ja Heikki Härmä Kallioluoma bálgosis.

Váhčira bálgosa boazoisit Tuomas Semenoff lea mielas, go lea beassan mielde boazomearkaváljagoddái, muhto ii goit hálit álgit bearehaga rápmot iežas mearkadovdamuša.

– Mu evttohedje dán lávdegoddái ja leahan mus juoga veardde vásáhus mearkkain ja dieđán juoidá dáin. Danne jurddašin, ahte sáhtán álgit dán bargui, muitala Semenoff.

Tuomas Semenoff.
Tuomas Semenoff mielas lea buorre, ahte Supmii leat maid dál vuođđudan sullásaš mearkalávdegotti go Norggas. Govva: Vesa Toppari / Yle

Semenoff deattuha, ahte mearkaváljagoddi lea ođđa ášši Suomas.

– Oainnán hui dehálažžan, ahte dákkár lávdegoddi lea dál vuođđuduvvon. Norggashan leamašan juo guhká dákkár sullasaš mearkalávdegoddi, mii dutká eahpečielga beljiid ja mearkkaid ja dahká iežas dulkojumi. Jus boazu lea rievdaduvvon, de dat lávdegoddi geahččá ja dulko, ahte makkár mearkkas dat lea vejolaččat rievdaduvvon. Buorre, ahte Supmiige oažžut sullasaš ortnega, dadjá Tuomas Semenoff.

Divvojuvvon 24.9. dii. 12.27: Ovddasteaddjiid leat válljen njeallje sierra guovllus.

Varrasamosat: Sápmi

Váldoođđasat

Varrasamosat

Muualla Yle.fi:ssä