Sápmi |

Guldal jiena: "Buorre dovdu, go sáhttá čiŋadit bargui" – Sámemusea Siiddas biggohedje álbmotbiktasiid

Suomas ávvudit gaskavahku Suoma álbmotbiktasiid. Maiddái Sámemusea Siida válddii oasi dán beaivái.

Sáárákáisá Seurujärvi, Minna Väisänen ja Teija Kaartokallio
Sáárákáisá Seurujärvi, Minna Väisänen ja Teija Kaartokallio ledje čiŋadan Suoma álbmotbivttasbeaivvi gudnin. Govva: Britt-Inger Ruotsala / Yle

Suomas ávvudit odne gaskavahko Suoma álbmotbiktasiid. Dan gudnin leat ordnen riikkaviidosaš álbmotbiktasa biggohanbeaivvi, man ulbmilin lea oažžut álbmotbiktasiid eret bivttasskáhpes gávjjáid čoaggimis.

Maiddái Sámemusea Siida lea searvan dán beaivái. Siidda bargit Minna Väisänen, Teija Kaartokallio ja Sáárákáisá Seurujärvi ledje gárvodan beaivvi gudnin. Sin mielas lei somá, go besse vehá čiŋadit bargui.

Seurujärvis lea badjelis mááccuh nappo gákti, Teija Kaartokallio fas lea čiŋadan gahpiriin, liinniin ja solljuigin sihke čázehiiguin. Minna Väisänenis lei badjelis gárjillaš feresa, mii lea vehá geahppasot málle álbmotbiktasis.

– Olbmot giddejit olu fuomášumi, ja mus alddánge lea buorre dovdu, go sáhttá čiŋadit ná bargui, muitala Väisänen.

– Fuomášin, ahte ii mus leat gákti dáppe Anáris, muhto lihkus lei gahpir. Dat lea muđuige mu mielamiel gárvu, lohká Kaartokallio.

Karjalan vyö
Minna Väisänenä biktasa boahkánis leat Gárjila ivnnit. Govva: Xia Torikka / Yle

Gaskabeai sulain eai lean vuos oidnon galledeaddjit, geain livčče lean álbmotbivttas badjelis. Álbmotbiktasiid biggohanbeaivvi leat ordnen jagi 2010 rájes, nappo dat ii leat vel šaddan buohkaide oahpisin, árvala Väisänen.

– Maid lean háleštan olbmuiguin, de eai sii leat oba diehtánge dákkár beaivvi birra.

Kaartokallio mielde dákkár beaivi lea buorre sivva beassat čiŋadit.

– Ammal dat lea juo vehá spesiála, go coggá gávtti ja vuolgá olbmuid sisa – goittot dán geasi, go eai leat leamašan nu olu dáhpáhusat, maidda čiŋadit.

Sii buohkat liikojit atnit gávtti dahje álbmotbiktasa maiddái áibba dábálaš árgabeaivve.

– Mus lea Tuuteri-málle álbmotbivttas, de láven geavahit muhtumin dan biktasii gulli báiddi muđui eambbo, muitala Minna Väisänen.

– Mun láven muhtumin ruovttus coggat mááccuh ala ja vaikke čorgen de dat badjelis. Iihan dat dárbbaš álo buot gávtti osiiguin čiŋadit, dadjá Sáárákáisá Seurujärvi.

Guldal dás dovdduid Siidda álbmotbiktasiid biggohan -beaivvis. Jietna: Xia Torikka / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä