Sápmi

Guldal jiena: Buot guovlluid sámenuorat sáhttet searvat dáiddadáhpáhussii – lágideaddjit lohpidit skuvlejumi videoráhkadeamis

Anni-Sofia Niittyvuopio
Govva: Priváhtta

Dáhpáhusa bargi Anni-Sofia Niittyvuopio muitala, ahte buot Suoma sámemánát ja -nuorat sáhttet oassálastit dáhpáhussii. Streama beassá čuovvut gos beare.

Ohcejohkalaš Anni-Sofia Niittyvuopio, guhte doaibmá maid Sámedikki nuoraidráđi njunnošis, lea bargagoahtán Sámenuoraid dáiddadáhpáhusa ordnemiiguin. Son lea iešge mánnávuođa rájes sullii juohke jagi láven oassálastit dáiddadáhpáhussii.

Ii leat jahki Sámenuoraid dáiddadáhpáhusa haga, iige pandemiijage bisset dan ordnema.

Dáhpáhus ordnejuvvo neahtas livestreama hámis juo nuppádassii. Mánát ja nuorat sáhttet oassálastit dáhpáhussii videoin.

Buot sámemánát ja -nuorat sáhttet searvat

Dáhpáhusa bargi Anni-Sofia Niittyvuopio muitala, ahte buot sámemánát ja -nuorat sáhttet oassálastit dáhpáhussii beroškeahttá skuvllain. Skuvllain goittotge čuvvot dáhpáhusa, degomat ovdalge.

– Dat lea rabas dieđusge buot sámenuoraide ja mii háliidit movttiidahttit maid dakkár sámenuoraid, geat eai vealtttekeahttá loga skuvllas sámegiela dahje eai leat sámegielat oahpahusas, searvat sáddet midjiide videoid, Niittyvuopio lohká.

Vai juohkehaččas livčče buorit vejolašvuođat bargagoahtit videoiguin, lágideaddjit lohpidit ordnet skuvlejumi daid ráhkadeapmái.

Vejolašvuohta oažžut filmma riikaviidosaš festiválii ja Skábmagovaide

Dáhpáhusas válljejuvvojit sámenuoraid ovddasteaddjit riikaviidosaš Nuorra Kultuvra -festiválii. Datge lágiduvvo neahttasáttan.

Oassálastiin lea maid vejolašvuohta oažžut iežaset filmmaid oassin Skábmagovat -festivála mánáid ja nuoraid beaivve.

Dáiddadáhpáhusbargi mielde buot guovlluid sámenuorat sáhttet oassálastit dáhpáhussii Jietna: Inger-Elle Suoninen / Yle

Beaiváduvvon 25.3. dii. 6.45: Áššis muitaluvvui vuos boastut, ahte gii beare maid Suoma olggobealde sáhtášii oassálasttit. Dál divvojuvvon hápmái, ahte gii beare sáhttá čuovvut, muhto dušše Suomas orru sámemánát sáhttet oassálasttit.

Varrasamosat

Muualla Yle.fi:ssä