Sápmi |

Guldal jiena: Čearretsullo moratoria eai cealkke eret ovdal go Deanus leat bivdonjuolggadusat, main lea báikkálaččaid doarjja

Dál go Deanu guolástannjuolggadusaid leat ođadeamen, Áslat Holmberg Ellos Deatnu -joavkkus vuordá buoret soahpamuša.

Aslak Holmberg Deanu moratorias jagi 2017
Ellos Deatnu -jovkui gulli Áslat Holmberg háliida leat optimisttalaš Deanu guolástannjuolggadusaid ođademiin. Govas son lea Deanu moratorias jagis 2017. Govva: Ville Fofonoff / Yle

Moratoria lea ain fámus Deanu Čearretsullos. Ellos Deatnu -joavku ásahii moratoria Čearretsullui geasset 2017 čájehan dihte, ahte sii eai dohkket Deanu soahpamuša. Dál lea njealját geassi go moratoria lea Čearretsullos.

Áslat Holmberg Ellos Deatnu -joavkkus muitala, ahte dánge geasi sii leat fitnan moratoriabáikkis, muhto eai leat doppe šat oba áigge, nu mot vuosttas gease.

– Dat 2017 lei oalle earenomáš geassi, go dalle mii stuorát joavkkuin doppe kámpanjeriimet dadjat juo olles geasi, muitala Holmberg.

Ásahangeasi maŋŋá Ellos Deatnu -joavkku lahtut leat dušše muhtin veardde leamaš sullos. Maiddái guossit leat juohke jagi fitnan.

Dan ii vel sihkkarit dieđe, man guhká moratoria lea fámus.

– Dat lea ain fámus nu mot dalle 2017, go moratoria ásahuvvui. Dalle jo celkkiimet, ahte nu guhká go ráđđádallojuvvo ođđa soahpamuš, mii lea báikkálaččat dohkkehuvvon, nu guhká dat moratoria lea fámus ja nu guhká dán moratoriaguovllus eai leat dat dálá Deanu bivdonjuolggadusat fámus.

Ellos Deatnu -liikkeen moratorio.
Ellos Deatnu -joavkku ásahan moratoria lea Deanu Čearretsullos. Govva: Ellos Deatnu

"Lea liiba váldit buoret guvlui lavkkiid"

Deanu guolástannjuolggadusaid leat ođadeame ja loahppagiđa stáhtaráđđi nammadii Suoma ráđđádallangotti. Deanu soahpamušas lea mearriduvvon, ahte guolástannjuolggadusat leat mearreáiggi fámus. Vuosttaš guolástannjuolggadus lea fámus vihtta jagi guolástanbaji 2021 loahpa rádjái ja čuovvovaš njuolggadusat dan maŋŋá álo čieža jagi hávil.

Leage vejolaš, ahte boahtte geasi maŋŋá Čearretsullo moratoria celkojuvvo eret. Dat goit gáibida dan, ahte maŋit gease fámus lea guolástannjuolggadus, mas lea báikkálaččaid doarjja.

– Sáhttá jurddašit nu, ahte jus sámiid ovddasteaddjit dain ráđđádallamiin dorjot ođđa evttohusa, nu dalle livččiimet dakkár dilis, ahte moratoria ii šat dárbbaš leat fámus, go dallehan livččii dat báikkálaččaid dohkkehan soahpamuš, lohká Holmberg.

Su mielas orru, ahte ráđđádallamiin lea buoret vuolggasadji dál go jagis 2016.

– Nu mot mun ádden, ahte doppe livčče guokte váldomihttomeari: nubbi lea luossanáli dorvvasteapmi ja nubbi sámiid vuoigatvuođaid dorvvasteapmi.

Holmberg ieš háliida leat optimisttalaš dál go soahpamuša leat ođadeame.

–Gal doppe ferte juogalágán buorideapmi geavvat, muđuihan dat soahpamuš ii livččii rahppojuvvon. Dál leš oaidnit ja čuovvut dan proseassa mot dat manná, muhto goittotge lea liiba váldit buoret guvlui lávkkiid, Holmberg lohká.

Guldal Áslat Holmberga jearahallama dás. Jietna: Yle Areena
ellos deatnu moratorio teno tenon sopimus
Moratoria oaččui olu fuomášumi geasset 2017, go dat ásahuvvui Čearretsullui. Govva: Ellos Deatnu

Varrasamosat: Sápmi

Váldoođđasat

Varrasamosat

Muualla Yle.fi:ssä