Sápmi |

Guldal jiena: Dálkkádatpanela raporta váldá vuhtii sápmelaččaid vuosttaš háve álbmaláhkái – árbevirolaš diehtu máinnašuvvo oktan doaibmabidjun

Dálkkádatrievdan lea duođalaš váttisvuohta, mas ceavzimii biddjo deaddu Suoma dálkkádatpanela raporttas. Dutkidoavttir Juvvá Lemet, Klemetti Näkkäläjärvi leamašan áššedovdin dálkkádatraportta dahkamis.

Sámediggi 30.10.2014
Dutkidoavttir Klemetti Näkkäläjärvi buktá ovdán earret eará dan, mo ovdalis leamaš gávcci jagiáiggi, muhto dán áigge fargga jagiáiggit leat šat njeallje. Govva: Vesa Toppari / Yle

Dálkkádatrievdan lea duođalaš váttisvuohta, mas ceavzimii Suoma dálkkádatpanela raporttas biddjo deaddu. Dutkidoavttir Juvvá Lemet, Klemetti Näkkäläjärvi leamašan áššedovdin dálkkádatraportta dahkamis. Jietna: Linda Tammela / Yle

Suoma dálkkádatpanela lea álmmustahttán odne duorastaga viiddes raportta, mii guoská dálkkádatrievdamii vuogáiduvvama. Raporttas deattuhit, ahte vuoigáiduvvandoaimmat leat hohpolaččat.

Raporttas váldet dál vuosttas háve albmaláhkai vuhtii maiddái sápmelaččaid. Raporttas muitalit, ahte dálkkádatrievdama váikkuhusaid sápmelaččáide leat gieđahallan ovdal dušše almmolaš dásis. Ulbmilin lea maid nannet sápmelaččaid oasálasvuođa mearrádusaid dahkamis vuogáiduvvandoaimmaid ektui.

Dárkilis vuoigáiduvvanbargu árbevirolaš diehttiin ja ovdamearkka dihte Sámedikkiin dáhkidivčče sápmelaččaide buoret vejolašvuođaid vuogáiduvvat dálkkádatrievdamii.

Dutkidoavttir Juvvá Lemet, Klemetti Näkkäläjärvi leamašan áššedovdin dálkkádatraportta dahkamis. Näkkäläjärvi muitala, ahte son lea viehka duđavaš raportii ja dasa, mo sápmelaččat ja árbediehtu lea fuomášuvvon.

– Dat lea hui dárkilit bargojuvvon, hui ovdamearkalaš málle, lohká Näkkäläjärvi.

Goavvejagit soitet boahtit lasige

Dálkkádatrievdan lea stuorra ja fuolastuhtti uhkki buohkaide máilmmis. Sápmelaččaide dálkkádatrievdan čuohcá earenoamáš garrasit, go dan váikkuhusat leat oidnomis dehálaš árbevirolaš ealáhusain, degomat boazodoalus.

Näkkäläjärvi muitala, ahte das hui čielga ovdamearka lea goavvejahki ja dakkár jagit leat árvideames vuordimis maid boahttevuhtii.

– Lea čielggas, ahte mainnalágiin sápmelaččat leat eaktodáhtolaččat ráhkkanan vuogáiduvvamii. Leat sierralágán vugiid ealáhusa ceavzima várás váldán atnui, dieđusge lassibiebman lea okta, leat šaddan rievdadit ealáhusmálliid nu, ahte dat leat bastán ceavzit, čilge Näkkäläjärvi.

Dutkanjoavku, mas Näkkäläjärvi lea mielde, lea dahkan guokte stuorra dutkamuša dálkkádatrievdama váikkuhusain sámiide. Sin maŋimuš dutkamuš čájeha, ahte dálkkádatrievdan lea váikkuhan mearkkašahtti ládje Suoma boazosámiid ja muđuige árktalaš eamiálbmogiid birrasii, ealáhusaide ja kultuvrii.

Maŋimuš dutkamuš, man namma lea SAAMI, leamašan gáldun Suoma dálkkádatpanela raporttas.

Vuosttaš sullasaš plána Eurohpas

Suoma dálkkádatpanela raporta lea vuosttaš vuogáiduvvanplána, man leat bargan Eurohpas. Viiddes raporta dutká vuogáiduvvama eanangottiid mielde ja lea danin hui dárkil, oaivvilda Näkkäläjärvi.

Eanangottiid dálkkádatplánat leat ovdal guoskan eanemus osiin dálkkádatrievdama doalaheame ja vuogáiduvvamii ii leat biddjon nu olu fuomášupmi, dadjet raporttas.

Raportta duogážis Suoma dálkkádatpanela čielggadanfidnus leat mielde Áibmodiehtagiid lágádus, Helssega universitehta, Luondduriggodatguovddáš Luke ja Suoma birasguovddáš. Raportta dahkamii lea oassálastan mearkkašahtti dálkkádatdutkamuša áššedovddiid joavku.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä