Sápmi |

Guldal jiena: Davvisámegiela eatnigiela studeantaiskkus ii dagahan váttisvuođaid Juuso Vallei – čálii guhtta diimmu vaššiságaid birra

Dán jagi fáddán davvisámegiela eatnigiela iskosis ledje vaššiságat, sátnefriddjavuohta ja vealaheapmi.

Juuso Valle, Karigasniemi
Davvisámegiela eatnigiella iskkus lei áidna masa Valle geavahii obba dan áigge man lei vejolaš geavahit. Govva: Sara Wesslin / Yle

Studeantaiskosat leat dál meattá ja maŋimuš iskkus lei sámegiella eatnigiellan. Gáregasnjárgalaš Juuso Valle eatnigiella lea davvisámegiella ja son čálii dan maid studeantačállosiin.

– Dat lei diekkár čálliniskkus, ahte go suomagielas lea lohkandáidu ja čállindáidu, ahte leat guokte iskosa das, de sámegielas lea beare dat čállindáidu.

Juohke iskosa čađaheapmái lea vejolaš geavahit guhtta diimmu.

– Dat lei áidna iskkus dál mas mun geavahin dan buot. Dat ii lean váigat, muhto mun háliidin geavahit dasa nu olu áiggi, ahte das boahtá buorre ja ahte mun oaččun áššiid riekta.

Dán jagi davvisámegiela eatnigiela iskosa fáddán ledje vaššiságat, sátnefriddjavuohta ja vealaheapmi. Valle čálii fáttás, mas galggai suokkardallat media rolla vaššiságaid gilvimis ja eastadeamis.

Eará suokkardallanfáttát ledje vealaheami ja bilkideami váikkuhusat iešdovdui, vaššiságaid ja vealaheami eastadeapmi, vealaheami máŋggalágan vuogit ja gean vuoigatvuohta lea sátnefriddjavuohta.

Ávnnasin ledje Yle Sámi ođasteavsttat, NRK Sámi radiosátta, artihkal ja Njuoska Bittuid YouTube-video.

Boahttevuođa boles, oahpaheaddji dahje badjealmmái

Juuso Valle čálii oktiibuot guhtta iskosa dán giđa. Logahatbargguid oasil son lea geargan, muhto muhtun áššiid ferte vel dikšut. Son lea čađaheamen duppaldutkosa Sámi oahpahusguovddážii já son ferte vel čađahit boazodoallolinnjá bargguid.

– Mun barggan daid lohppii ja dasto sáhtán váldit ráfis.

Juuso Valles leat máŋggalágán plánat iežas boahttevuhtii. Sámegiella lea sutnje gal dehálaš ášši, muhto son ii jáhke ahte manašii lohkat dan viidásabbot universitehtii. Oahpu son áigu goittot gazzat.

– Mun bidjen ohcamuša Oulu universitehtii, ahte manašin lohkat eaŋgalasgiela oahpaheaddjin. Vuos mun ferten fitnat militeriijas ja mun áiggun ohcat vel Tampere bolesskuvlii.

Soahtebálvalus Valles álgá suoidnemánu álggus.

Guldal maid Juuso Valle muitalii Dearvva-sáddagis studeantačállosiid birra. Jietna: Anja Kaarret / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä