Sápmi |

Guldal jiena: Deanu oalgejogaid bearráigehččet dárkilabbot dán gease ja bearráigeahččit leat eanet go ovdal

Deanu guolledoalloguovlu, Lappi EJB-guovddáš ja Meahciráđđehus leat mearridan lasihit bearráigeahču Deanu oalgejogaide. Fuollan lea, ahte Deanu luossabivdogildosa dihte bivdodeaddu oalgejogain lassána.

Niilo I. Aikio
Niilo I. Aikio vuordá dán bivdobajis ráfálačča. Govva: Anneli Lappalainen / Yle

Deanu guolledoalloguovlu lea dahkan plána boahtte geassái Deanu oalgejogaid bivddu ektui. Deanu luossabivdogildosa dihte lea badjánan fuolla das, lassánago bivdodeaddu dál de eambo oalgejogaide. Deanu čázádagain ii oaččo dán gease bivdit luosa suodjalan dihte hedjonan luossanáli.

Deanu guolledoalloguovllu doaimmajođiheaddji Niilo I. Aikio muitala, ahte sii leat ovttas Meahciráđđehusain ja Lappi EJB-guovddážiin soahpan oktasaš bearráigeahčus.

Su mielde dán gease oalgejogaid guollebivddu gohcet eambo go ovdal.

– Guolledálloguovllus leat dál bearráigeahččit eanet go ovdal, ja sidjiide máksojuvvo buhtadus dain reaissuin. Meahciráđđehus maid boahtá lasihit deike bearráigeahču. EJB-guovddážii gullet Deatnu, Anár- ja Skiehččanjohka, muhto daid lassin EJB-guovddáš boahtá fitnat maid oalgejogain, čilge Aikio.

Niilo I. Aikio vuordá geasi guollebivdoáigodagas ráfálačča. Vaikko son leage muhtin veardde fuolas das, ahte bivdu oalgejogain lassána, de jáhkká goittotge, ahte buorre ráhkkaneapmi veahkeha.

– Galhan dieđus dihtolágan ballu bivddu lassáneamis doppe lea. Dasa ferte gárvet bearráigeahču ja iskkat eastalit, ahte eai beasaše dáhpáhuvvat makkárge lobihisvuođat.

Guldal olles jearahallama dás. Jietna: Inger-Elle Suoninen / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä