Sápmi

Guldal jiena: Eanodat-lunta geahččala čánset nissoniid, geain lea jo guoibmi Temptation Island -prográmmas

Joni Daniel Wallén
Eanodatlaš Joni Daniel Wallén lea mielde Temptation Island Suopma -prográmma ođđa bajis. Govva: Lars Johnson / Nelonen Media

Eanodatlaš Joni Daniel Wallén muitala, ahte son beasai duođas testet flirtendáidduidis Temptation Island olis.

Temptation Island Suopma -prográmma ođđa bajis lea mielde eanodatlaš Joni Daniel Wallén. Son ássá Jyväskyläs, muhto lea Eanodagas eret.

Temptation Island -prográmmas njeallje pára vulget paradiisasullui, muhto párat eai oro ovttas doppe. Nissonat ja albmát leat sierra, ja sin guoimmuhit siŋgelat.

Ráiddu leat dábálaččat govven olgoriikkain, muhto koronadili dihte ođđa badji govvejuvvui geassit Suomas.

22-jahkásaš Wallén lea okta dain siŋgeliin, guhte geahččala čánset várrejuvvon nissoniid. Son beasaige duođaš geavahit flirtendáidduidis.

– Oaččui gal duođas geahččalit nu bures go máhttá, muhto das seammás ohppen dovdat iežange buorebut. Danhan oaidná de dasto, lohká Wallén.

Joni Daniel Wallén muitala, ahte son ii ieš ohcan prográmmii. Son ii iešalddes leat velge sihkkar, ahte gii su dohko almmuhii fárrui.

– Go gullen, ahte mu namas lei dahkkon ohcamuš de jurddašin fal, ahte na maninba ii. Buvttadanfitnodat válddii de munnje oktavuođa ja fáhkka ledjenge doppe govvemiin, muitala Wallén.

Temptation Island Suopma oidnogoahtá tv:s čakčamánu 30. beaivve Nelonen-kanálas. Wallén ii dán vuoro oaččo muitalit dađi eambo das, mii doppe dáhpáhuvai, muhto ávžžuha olbmuid geahččat, dasgo drámá ja eará sisdoallu lea su mielde olu.

Guldal Joni Daniel Walléna jearahallama dás. Jietna: Xia Torikka / Yle

Varrasamosat

Muualla Yle.fi:ssä