Sápmi |

Guldal jiena: Eatnameamet-dokumeanta beaggá olgoriikka filbmafestiválain, muhto bagadalli Suvi West mielas lea deháleamos joksat dábálaš gehččiid Suomas

Suvi West dokumentára Eatnameamet lei evttohassan buoremus davviriikalaš dokumeantafilbman Nordisk Panorama -filbmafestiválas Ruoŧas, muhto dán háve filbma ii birgen. Bagadalli ii leat behtton, muhto illuda das, ahte filbma beaggá maiddái Suoma rájáid olggobealde.

Elokuvaohjaaja Suvi West helmikuussa 2021 kuvattuna Helsingin Käpylässä.
Suvi West illuda das, ahte filbma beaggá maiddái Suoma rájáid olggo bealde. Govva: Linda Tammela / Yle

Suvi West dokumentára Eatnameamet ii birgen Nordisk Panorama -filbmafestiválas Ruoŧas. Maŋŋebárgga Malmös bálkkašedje Davviriikkaid buoremus filmmaid ja sámi filbmabagadalli Suvi West filbma Eatnameamet - Min jaskes dáistaleapmi lei evttohassan buoremus dokumeantafilbman.

Festiválas Davviriikkaid buoremus dokumentáran bálkkašuvvui Yasaman Sharifmanesh filbma Aboli's journey. Gilvoluohkás ledje mielde oktiibuot 14 filmma.

West ii leat eisege behtton, ahte filbma ii birgen. Bagadalli lea baicce ilus das, ahte filbma beaggá maiddái ruovtturiikka rájáid olggobealde.

– Ii livčče jáhkkán, ahte mii válljejuvvot dákkár gilvui ja dákkár festiválii. Eandalitge, go dan válljejumi leat dahkan olbmot olggobealde Suoma. Dat lei mo nu áibbas ártet, ahte dát filbma doaibmá maiddái olgoriikkain, dadjá West.

"Filbmafestiválat ja dábálaš geahččit leat guokte sierra máilmmi"

Eatnameamet – Min jaskes dáistaleapmi muitala Suoma stáhta sámepolitihkas ja sápmelaččaid dáistaleamis iežaset álbmoga ja kultuvrra bealis.

Filbma lea árat vuoitán earret eará Tampere filbmafestiválas gehččiid bálkkašumi ja Girku mediasäätiö bálkkašumi. Mannan vahkus filbma vuittii Ruonáeatnamis Nuuk riikkaidgaskasaš filbmafestiválas buoremus dokumentára bálkkašumi.

Vaikko filbma dál beaggáge festiválain ja oažžu gudni, de West háliida sirret filbmafestiválamáilmmi ja dábálaš gehččiid.

– Man nu sivas mii bidjat hui olu deattu dan filbmafestiválas johtimii ja lihkosmuvvamii, muhto dat ii vealttekeahttá daga dakkár albma váikkuhusa. Váikko livččiimet vuoitánge, de dat ii livčče moge rievdadan dili mii sámiin Suomas lea.

– Muhto tv fas lea dakkár, mii sáhttá buktit veháš rievdadusa ja jus dan oidnet obmot viidát olggobealde filbmaindustriija. Min vuolggasadji leamašan álot, ahte mii juksat gehččiid Suomas ja vai dat diehtu ja dilli mo nu láhkai rievddašii dáppe, dadjá West.

Suvi West ii leat eisege behtton, ahte filbma ii birgen Nordisk Panorama -filbmafestiválas Ruoŧas. Bagadalli Suvi West lei mielde Buorre Iđit Sápmi -sáddagis 22.9.2021. Jietna: Jaana Kynkäänniemi / NRK

Yle Ođđasiid Sámis ja Beaivvi ságaid sáhttá guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä