Sápmi |

Guldal jiena: Emmi Nuorgam lea nammaduvvon oktan máilmmi 50 eanemus váikkuhanválddálaš váikkuheaddjimárkanasti listui

Influencer50 lea jahkásaš listu, mas čalmmustahttet váikkuheaddjimárkanastiid girjáivuođa máilmmeviidosaččat.

Emmi Nuorgam
Emmi Nuorgam lea nammaduvvon oktan máilmmi eanemus váikkuhanválddálaš váikkuhanmárkanastima ámmátlažžan. Govva: Juuli Aschan

Hálli, sosiála media váikkuheaddji ja čálli Emmi Nuorgam lea nammaduvvon oktan 50 eanemus váikkuhanválddálaš váikkuheaddjimárkanastima ámmátlažžan Influencer50-listui.

Sus lea buorre dovdu nammadeamis, iige son máhttán vuordit dakkára. Vuos son oaččui áššis dieđu rávdnjepoastta bokte, muhto illá son vuos jáhkii dasa.

– Ikte bođii vel diehtu ja liŋka dán listui ja ođđasii, dalle jurddašin ahte várra ferte jáhkkit dasa, go geardde bođii vel ođđasit diehtu. Dasto fitnen geahččamin daid dieđuid ja ledjen hui hirpmástuvvan ja heahkastuvvan das, muitala Nuorgam.

Nammadeami ákkaid vuođul Nuorgam lea leamašan njunušin Suoma stáhtaráđi ja sosiála media váikkuheddjiid diehtu koronavirusis -kampánnjas. Kampánnja ulbmilin lei lebbet eiseválddiid addin rivttes dieđu koronavirusis álbmogii sosiála media váikkuheddjiid bokte.

– Lea somá gullat, ahte servodatlaš beali ja dan ovdáneami árvvusatnet ja dan, maid lea daid ovdii bargan, dadjá Nuorgam.

Nuorgam mielde lea buorre, ahte dán prošeavtta leat čalmmustahttán ja dovddastan riikkaviidosaččat ja, ahte sihke eiseválddiid ja sosiála media váikkuheaddjiid ovttasbarggu atnet miellagiddevažžan.

– Suopma lea muđuige oalle ovdavázzi das, mo ovdamearkka dihte dieđihangaskaoamit ja eiseválddit dahket ovttasbarggu, čilge Nuorgam.

Guldal dás Emmi Nuorgam jearahallama. Jietna: Laura Pieski / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä