Sápmi |

Guldal jiena: Gállokii čoahkkanedje vuostálastit ruvkkiid – politihkkár: "Boazodoallu buktá eambo ekonomiijai"

Johkamohkelaš politihkkár Henrik Blind mielde ruvkkiid ii sáhte ákkastallat oba ekonomalaš sivaid geažil.

Henrik Blind
Politihkkár Henrik Blind mielde ruvkkiid buvttadanáigi lea nu oanehaš, ahte dat buvttada loahppaloahpas uhccit ruđa go boazodoallu. Govva: Carl-Johan Utsi / SVT Sápmi

Johkamohki Gállokii ledje olbmot fas čoahkkanan mannan vahkkoloahpa, go ságat ođđa ruvkki birra leavvagohte. Ruvkefitnodat áiggošii roggagoahtit málmma Gállokis. Báikki ala ledje čoahkkanan moaddelogi olbmo. Gállokis leat dáistalan ruvkedoaimmaid vuostá ovdal maid.

Johkamohkelaš politihkkár Henrik Blind (birasbellodat) lei okta sis, guhte lei boahtán báikki ala.

– Mu mielas lea dehálaš leahkit dáppe, ja doarjjun dán mii dáppe dáhpáhuvvá, ja oaidnit gait daid olbmuid geat leat dáppe ja dovdat dan fámu, maid dat addá munnje gait iežáide, geat barget ruvkkiid vuostá.

Blind mielde ruvkkiid ii sáhte ákkastallat oba ekonomalaš váikkuhusainge, daningo ruvkkiid buvttadanáigi ii leat nu guhki.

– Lohket, ahte lea dušše 15 jagi. Jus de jurddaša, ahte geat dáppe leat eallán ja boazodoalu, mii lea leamašan dán máŋga čuohte jagi. Ja de jus rehkenastit mii addá eanemus báikkálaš ekonomiijai, de lea oba álki rehkenastit, ahte dat lea dat boazodoallu ja dat barggut, mat lea čadnon lundui.

Jietna: Tobias Poggats

Varrasamosat: Sápmi

Váldoođđasat

Varrasamosat

Muualla Yle.fi:ssä